Santiago de Compostela, 31 de xullo de agosto de 2025

O Diario Oficial de Galicia (DOG) publica hoxe a ampliación en máis de 5,3 millóns de euros da dotación orzamentaria das axudas IA360, destinadas ao desenvolvemento tecnolóxico e á innovación mediante o uso da intelixencia artificial. O aumento do crédito céntrase na liña A, das tres coas que conta o programa. Esta liña inicialmente dispoñía dun orzamento de 5,5 millóns de euros, que agora se eleva ata os 10,8 millóns para atender un maior número de proxectos.

O programa IA360 naceu co obxectivo de fomentar a incorporación da intelixencia artificial no tecido produtivo galego, a través das tres mencionadas liñas de actuación, todas elas  complementarias. A liña A, que é a que agora recibe a ampliación, está dirixida ao desenvolvemento tecnolóxico e á comercialización de novos produtos e servizos baseados en IA.

Pola súa banda, a liña B apoia a implantación de solucións comerciais de intelixencia artificial e proxectos de xestión estratéxica do dato para mellorar a competitividade empresarial. E a liña C promove accións formativas para capacitar ás persoas traballadoras en competencias vinculadas á intelixencia artificial e facilitar a súa integración nas cadeas de valor das empresas.

No caso da liña A, a ampliación permitirá atender un maior número de solicitudes, tras pechar o prazo de presentación o pasado 30 de abril cun total de 117 proxectos rexistrados, o que puxo de manifesto o interese crecente do tecido empresarial galego por aplicar esta tecnoloxía aos seus procesos produtivos, comerciais ou de servizo.

As axudas da liña A poden acadar ata o 60% do investimento no caso das pequenas empresas, 50% para as medianas e ata o 40% para as grandes empresas, cun importe máximo por proxecto de 1 millón de euros. Entre os custos subvencionables inclúense os gastos de persoal, equipamento, obras necesarias para a posta en marcha e custos indirectos asociados. Os proxectos deberán ter un orzamento mínimo de 100.000 euros e un nivel de madurez tecnolóxica equivalente a TRL 6 ou superior.

O programa está cofinanciado polo Plan de Recuperación, Transformación e Resiliencia, a través dos fondos europeos NextGenerationEU, e forma parte da iniciativa RETECH-Cadea de valor en Intelixencia Artificial. Trátase dunha aposta estratéxica para impulsar a tecnoloxía como motor de crecemento e modernización das empresas galegas.

A ampliación orzamentaria non supón a reapertura do prazo de solicitudes. As condicións da convocatoria mantéñense sen cambios, e o apoio continuará prestándose por orde de entrada das solicitudes completas.

Con esta medida, a Xunta reafirma o seu compromiso coa innovación e a transformación dixital, facilitando que as empresas galegas poidan incorporar tecnoloxías avanzadas que lles permitan gañar eficiencia, diversificar mercados e liderar cadeas de valor intelixentes.