Santiago de Compostela, 4 de agosto de 2025

A Consellería do Medio Rural informa da situación dos incendios forestais rexistrados en Galicia con datos recollidos ata as 08.30 horas de hoxe luns.

Estabilizado Ponteceso-A Graña

Estabilizado desde as 00.01 de hoxe o lume forestal do municipio coruñés de Ponteceso, parroquia da Graña, que segundo as últimas estimacións afecta unha superficie de 100 hectáreas. O incendio comezou ás 00.30  horas da madrugada do domingo e para a súa extinción mobilizáronse, polo de agora, 1 técnico, 16 axentes, 17 brigadas, 16 motobombas, 2 unidades técnicas de apoio e 8 helicópteros.

Estabilizado Ponteceso-Brantuas

Ás 23.32 de onte deuse por estabilizado outro incendio neste mesmo concello, parroquia de Brantuas, que segundo as últimas estimacións afecta unha superficie de 170 hectáreas. O lume comezou ás 20.30 horas do pasado  sábado e, polo de agora, mobilizáronse para a súa extinción 4 técnicos, 15 axentes, 14 brigadas, 12 motobombas, 2 pas, 3 unidades técnicas de apoio, 2 helicópteros e 11 avións.

Estabilizado Vilardevós-Terroso, desactivada Situación 2

Está estabilizado dende as 22.38 horas de onte, domingo, o lume forestal do concello ourensán de Vilardevós, parroquia de Terroso, que segundo as últimas estimacións afecta unha superficie de arredor de 570 hectáreas. Neste incendio foi preciso decretar a Situación 2 pola súa proximidade a núcleos de poboación, unha situación operativa de emerxencia que foi desactivada ás 22.15 horas de onte.

O incendio iniciouse ás 23.04 horas do pasado venres e para a súa extinción mobilizáronse, polo de agora, 7 técnicos, 49 axentes, 71 brigadas, 48 motobombas, 6 pas, 12 helicópteros e 12 avións. Ademais, tamén participaron nos labores de extinción de efectivos da Unidade Militar de Emerxencias (UME).

Estabilizado Vilar de Barrio-Rebordechau

Está tamén estabilizado dende as 21.07 horas de onte o incendio forestal da localidade ourensá de Vilar de Barrio, parroquia de Rebordechau, que segundo as últimas estimacións provisionais afecta unha superficie que rolda as 20 hectáreas. O lume iniciouse ás 12.31 horas do domingo e, polo de agora, mobilizáronse para a súa extinción 1 técnico, 7 axentes, 22 brigadas, 9 motobombas, 1 pa, 6 helicópteros e 6 avións.

Estabilizado Ponteceso-Cospindo

Mantense estabilizado dende as 19.56 horas de onte o incendio do concello coruñés de Ponteceso, parroquia de Cospindo, que segundo as últimas estimacións afecta unha superficie de 200 hectáreas. O lume iniciouse ás 16.12 horas do pasado sábado e, polo de agora, mobilizáronse para a súa extinción 1 técnico, 12 axentes, 13 brigadas, 10 motobombas, 3 pas, 3 unidades técnicas de apoio, 4 helicópteros e 1 avión.

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que acadan as 20 hectáreas poderá ser consultada na conta aberta de X (antigo twitter): @incendios085.