Santiago de Compostela, 4 de agosto de 2025

A Consellería do Medio Rural informa da situación dos incendios forestais rexistrados en Galicia con datos recollidos ata as 20.00 horas de hoxe luns.

Extinguido Vilar de Barrio-Rebordechau

Desde as 18.15 horas de hoxe está extinguido o incendio forestal da localidade ourensá de Vilar de Barrio, parroquia de Rebordechau, que finalmente afectou unha superficie de 34 hectáreas, todas elas de monte raso. O lume iniciouse ás 12.31 horas do domingo e para a súa extinción mobilizáronse, en conxunto, 1 técnico, 8 axentes, 24 brigadas, 9 motobombas, 1 pa, 6 helicópteros e 6 avións.

Estabilizado Ponteceso-A Graña

Permanece estabilizado desde as 00.01 de hoxe o lume forestal do municipio coruñés de Ponteceso, parroquia da Graña, que segundo as últimas estimacións afecta unha superficie de 100 hectáreas. O incendio comezou ás 00.30 horas da madrugada do domingo e para a súa extinción mobilizáronse, polo de agora, 3 técnicos, 17 axentes, 17 brigadas, 21 motobombas, 2 unidades técnicas de apoio e 8 helicópteros.

Estabilizado Ponteceso-Brantuas

Desde as 23.32 de onte domingo permanece estabilizado outro incendio neste mesmo concello, parroquia de Brantuas, que segundo as últimas estimacións afecta unha superficie de 170 hectáreas. O lume comezou ás 20.30 horas do pasado sábado e, polo de agora, mobilizáronse para a súa extinción 5 técnicos, 18 axentes, 20 brigadas, 17 motobombas, 2 pas, 3 unidades técnicas de apoio, 3 helicópteros e 11 avións.

Estabilizado Ponteceso-Cospindo

Continúa tamén estabilizado dende as 19.56 horas de onte o incendio do concello coruñés de Ponteceso, parroquia de Cospindo, que segundo as últimas estimacións afecta unha superficie de 200 hectáreas. O lume iniciouse ás 16.12 horas do pasado sábado e, polo de agora, mobilizáronse para a súa extinción 2 técnicos, 14 axentes, 15 brigadas, 12 motobombas, 3 pas, 3 unidades técnicas de apoio, 4 helicópteros e 1 avión.

Estabilizado Vilardevós-Terroso, desactivada Situación 2

Segue tamén estabilizado dende as 22.38 horas de onte, domingo, o lume forestal do concello ourensán de Vilardevós, parroquia de Terroso, que segundo as últimas estimacións afecta unha superficie de arredor de 570 hectáreas. Neste incendio foi preciso decretar a Situación 2 pola súa proximidade a núcleos de poboación, unha situación operativa de emerxencia que foi desactivada ás 22.15 horas de onte domingo.

O incendio iniciouse ás 23.04 horas do pasado venres e para a súa extinción mobilizáronse, polo de agora, 12 técnicos, 57 axentes, 77 brigadas, 49 motobombas, 6 pas, 12 helicópteros e 12 avións. Ademais, tamén participaron nos labores de extinción de efectivos da Unidade Militar de Emerxencias (UME).

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que acadan as 20 hectáreas poderá ser consultada na conta aberta de X (antigo twitter): @incendios085.