O Proxecto Nós sitúa a Galicia no mapa da intelixencia artificial europea da man de Microsoft
A empresa tecnolóxica colaborará co Centro Singular de Investigación en Tecnoloxías Intelixentes para apoiar unha nova liña de investigación nesta ferramenta que busca introducir o galego na vangarda tecnolóxica
O obxectivo é desenvolver modelos fundacionais que garantan a integración da lingua galega en sistemas dixitais avanzados
Impulsado inicialmente pola Xunta de Galicia e a Universidade de Santiago de Compostela, a finalidade desta iniciativa é promover a inclusión do galego no mundo dixital
Santiago de Compostela, 5 de agosto de 2025
O Proxecto Nós, a iniciativa impulsada inicialmente pola Xunta de Galicia e a Universidade de Santiago de Compostela para incorporar o galego ás novas linguaxes dixitais, entra nunha nova fase tras o anuncio feito pola compañía tecnolóxica Microsoft de colaborar con tres centros de investigación de referencia en España para o desenvolvemento de modelos de Intelixencia Artificial multilingüe. Así, un dos seleccionados é o Centro Singular de Investigación en Tecnoloxías Intelixentes da Universidade de Santiago de Compostela que, xunto ao Instituto da Lingua Galega impulsou o desenvolvemento do Proxecto Nós.
Esta colaboración supón un chanzo máis na consolidación do galego no ámbito dixital e nas tecnoloxías do futuro e reforza o papel do Goberno galego no desenvolvemento dunha iniciativa que define o futuro dos modelos fundacionais da Intelixencia Artificial, contribuíndo ao progreso tecnolóxico cunha proposta construída en galego, desde Galicia e con proxección internacional.
Nado en 2020, o Proxecto Nós é unha iniciativa impulsada pola Xunta de Galicia, encomendada á Universidade de Santiago de Compostela a través do CiTIUS e o Instituto da Lingua Galega co obxectivo de garantir a presenza do galego no entorno dixital do século XXI. O proxecto foi clave na creación de infraestruturas lingüísticas de base: desde corpus abertos e bancos de datos ata ferramentas de tradución automática, síntese e recoñecemento de voz. En 2023, o equipo presentou Carballo, o primeiro modelo lingüístico de gran escala adestrado integramente en galego.
O Proxecto Nós tivo continuidade en iniciativas como ILENIA (Impulso de las Lenguas en la Inteligencia Artificial) e ALIA (Artificial Linguistic Intelligence for Administration). Os recursos desenvolvidos son de libre acceso por terceiros, o que permite e facilita o desenvolvemento de produtos e servizos finais baseados na lingua galega, por parte das empresas, institucións e organizacións, tanto públicas como privadas, que así o desexen.
Este traballo a prol do galego no mundo dixital encádrase no compromiso da Consellería de Cultura, Lingua e Xuventude ao abeiro do Pacto pola Lingua e co obxectivo de impulsar o seu uso, incentivar a súa presenza en todos os sectores da sociedade e prestixialo como idioma nos diferentes espazos de convivencia.
