Santiago de Compostela, 7 de agosto de 2025

A directora xeral de Promoción da Igualdade, María Quintiana, reuniuse hoxe coa presidenta da Asociación de Mulleres Científicas e Tecnólogas (Amit), Carmen Martínez, para avaliar novas vías de colaboración entre a Xunta, entre elas a necesidade de seguir impulsando o emprendemento feminino no eido tecnolóxico e científico, con apoios claves como o programa Emega da Xunta de Galicia.

Durante o encontro, no que tamén participou a responsable de Woman Emprende da USC, Eva López Barrio,  a directora xeral recordou que a convocatoria do programa de apoio ao emprendemento feminino está aberta ata o 14 de agosto, explicando que unha das tres modalidades é a Emega Innova, enfocado en impulsar proxectos con base científica, innovadora e tecnolóxica. Así, María Quintiana e Carmen Martínez, analizaron a situación das mulleres no eido da investigación e as dificultades e barreiras coas se atopan á hora tanto para continuar na carreira investigadora coma para poñer en marcha un emprendemento. Así, a directora xeral trasladoulle as iniciativas que está desenvolvendo a Xunta neste sentido como son a Estratexia galega de emprego feminino en sectores masculinizados, o propio programa Emega ou o Galicia Investiga Igualdade. Así mesmo, ambas as dúas acordaron seguir estreitando a colaboración e así continuar dando pasos adiante cara unha Galicia máis igualitaria.