Santiago de Compostela, 11 de agosto de 2025.- A Consellería do Medio Rural informa da situación dos incendios forestais rexistrados en Galicia con datos recollidos ata as 14.00 horas de hoxe luns.

A CORUÑA

Estabilizado Monfero-Queixeiro. Afecta o Parque Natural das Fragas do Eume

Desde as 20.28 horas de onte domingo está estabilizado o incendio do concello de Monfero, parroquia de Queixeiro, que se iniciou ás 17.01 horas de onte e que afecta o Parque Natural das Fragas do Eume. A superficie afectada estimada provisional é de arredor de 5 hectáreas. Para a súa extinción mobilizáronse polo de agora 10 axentes, 12 brigadas, 8 motobombas, 1 pa e 1 helicóptero.

LUGO

Controlado A Fonsagrada-Monteseiro

Está controlado desde as 14.42 horas de onte domingo o incendio forestal do concello lucense da Fonsagrada, parroquia de Monteseiro, que se iniciou ás 15.30 horas do martes e que, segundo as últimas estimacións, afecta arredor de 150 hectáreas. Para a súa extinción mobilizáronse, ata o momento, 6 técnicos, 59 axentes, 77 brigadas, 81 motobombas, 3 pas, 7 helicópteros e 8 avións.

OURENSE

Activo Verín-Mourazos. Solicitada a Situación 2

Está activo un incendio forestal no concello ourensán de Verín, parroquia de Mourazos, no que se vén de solicitar a Situación 2 como medida preventiva pola proximidade ao núcleo de poboación de Tamagos. Para a súa extinción mobilizáronse, polo de agora, 1 técnico, 4 axentes, 3 brigadas, 2 motobombas, 1 pala, 3 helicópteros e 4 avións.

Activo Chandrexa de Queixa-Requeixo

Continúa activo desde as 15.51 horas do venres o incendio forestal do concello de Chandrexa de Queixa, parroquia de Requeixo, que segundo as últimas estimacións provisionais afecta a máis de 1.600 hectáreas. Para a súa extinción mobilizáronse, ata o momento, 12 técnicos, 40 axentes, 66 brigadas, 34 motobombas, 6 pas, 4 unidades técnicas de apoio, 12 helicópteros e 10 avións.

Activo Vilariño de Conso-Mormentelos

Desde as 17.30 horas de onte domingo está activo un lume no concello de Vilariño de Conso, parroquia de Mormentelos, que segundo as últimas estimacións provisionais rolda as 180 hectáreas de superficie afectada e evoluciona favorablemente. Para a súa extinción mobilizáronse polo de agora 8 axentes, 15 brigadas, 11 motobombas, 2 pas, 1 unidade técnica de apoio, 2 helicóptero e 4 avións.

Estabilizado Maceda-Castro de Escuadro. Desactivada Situación 2

Está estabilizado, desde as 23.37 horas do domingo, o incendio do concello de Maceda, parroquia de Castro de Escuadro, que se iniciou o sábado ás 23.19 horas e que segundo as últimas estimacións provisionais afecta arredor de 400 hectáreas. Iniciouse en entre cinco e seis puntos case simultáneos, o que apunta cara unha clara intencionalidade. Neste lume xa foi desactivada onte a Situación 2, que fora declarada na madrugada do domingo pola súa proximidade ao núcleo da Teixeira. Para a súa extinción mobilizáronse polo de agora 5 técnicos, 20 axentes, 31 brigadas, 24 motobombas, 4 pas, 5 helicópteros e 6 avións.

Controlado Padrenda-Padrenda

Permanece controlado, desde as 01.23 horas do domingo, o lume que afecta o concello de Padrenda, parroquia homónima, que se iniciou o venres ás 22.03 horas e que segundo as últimas estimacións provisionais rolda as 40 hectáreas. Para a súa extinción, mobilizáronse polo de agora 10 axentes, 25 brigadas, 8 motobombas, 1 pa, 2 helicópteros e 2 avións.

PONTEVEDRA

Estabilizado A Estrada-Souto

Esta estabilizado desde as 22.10 horas de onte o incendio forestal do concello da Estrada, parroquia de Souto, que se iniciou onte domingo ás 12.37 horas e que segundo as últimas estimacións provisionais rolda as 20 hectáreas de superficie afectada. Para a súa extinción, mobilizáronse polo de agora 1 técnico, 7 axentes, 15 brigadas, 15 motobombas, 4 pas, 2 unidades técnicas de apoio, 4 helicópteros e 3 avións.

A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que acadan as 20 hectáreas poderá ser consultada na conta aberta de X (antigo twitter): @incendios085.