Lugo, 7 de setembro de 2025

O conselleiro de Emprego, Comercio e Emigración, José González, acompañado polo delegado territorial da Xunta en Lugo, Javier Arias, e polo director xeral de Comercio e Consumo, Gabriel Alén, vén de visitar a libraría Lectocosmos, distinguida co Premio Comercio Galego 2024. Alí, aproveitou para animar aos negocios do sector a concorrer á nova edición dos Premios do Comercio Galego, aberta ata o 26 de setembro e que busca recoñecer o labor destes profesionais claves na dinamización económica e vertebración do territorio.

En concreto, os establecementos poden resultar recoñecidos en cinco categorías: Premio Comercio Galego 2025, dotado con 5.000 euros; Premio Comercio Traxectoria 2025, ao que lle corresponden 3.000 euros; Premio Comercio Emprende 2025, distinguido con outros 3.000 euros; Premio Comercio Dinamización 2025, cunha contía de 5.000 euros; e Premio Comercio Sostible 2025, con 3.000 euros.

Durante a visita, González puxo a libraría Lectocosmos como exemplo de bo facer, destacando o traballo da súa responsable, Gloria Fuertes, e salientando a vitalidade e o dinamismo do negocio, que vai máis alá da actividade comercial para converterse nun espazo de encontro e dinamización cultural, grazas á organización de presentacións, actos e outras iniciativas que contribúen a impulsar a vida do barrio e reforzar o tecido social. Tamén puxo en valor o seu firme compromiso coa atención ao público, situando ás persoas no centro da súa proposta, e incidiu no papel esencial do pequeno comercio no desenvolvemento económico e social das contornas urbanas e rurais.

Concretamente, a libraría Lectocosmos foi recoñecida co Premio Comercio 2024, dotado con 5.000 euros, pola súa aposta por un modelo de xestión innovador, competitivo e en sintonía cos desafíos actuais, converténdose nun referente dos valores que promove a Xunta no eido comercial para garantir o posicionamento do sector na economía galega.

Na mesma convocatoria de 2024 foron tamén galardoados a Asociación Centro Comercial Aberto Carballo, co Premio Comercio Dinamización 2024; o comerciante Vicente Ábalo, cunha longa traxectoria no sector téxtil en Vilagarcía de Arousa e Pontevedra; a firma ourensá AO Domini, centrada na artesanía aplicada ao interiorismo e ao téxtil; e a tenda de moda feminina La Böcöque, con sede en Cangas, recoñecida polo seu enfoque en consumo responsable.

Plan estratéxico do comercio

O conselleiro enmarcou os galardóns no compromiso da Xunta cun sector comercial sólido, adaptado ás novas tendencias e capaz de responder ás demandas da cidadanía, tanto polo seu papel como motor económico e xerador de emprego, como pola súa capacidade para estruturar o territorio.

Nesa liña, lembrou que xa está en marcha o Plan estratéxico do comercio de Galicia 2025-2030, unha planificación a medio prazo dotada con máis de 320 millóns de euros e que contempla 74 medidas concretas para reforzar un comercio local máis sostible, competitivo e de calidade, asegurando a súa viabilidade futura.