Ourense, 06 de outubro de 2025

O delegado territorial da Xunta de Galicia en Ourense, Manuel Pardo, supervisou esta mañá, acompañado de técnicos da Axencia Galega de Infraestruturas, o estado das obras na nova senda do río Barbaña entre a Ponte Vella e Expourense, á altura da Ponte Codesal, baixo a rúa Marcelo Macías.

O delegado territorial destacou que as actuacións que se están a levar a cabo neste enclave adquiren unha gran relevancia por tratarse dunha intersección importante dentro do ámbito global do proxecto porque non só dá continuidade á nova senda, se non que comunica de xeito transversal para enlazar ambas marxes do río co núcleo da cidade.

Tamén subliñou que con esta intervención a senda que vén dende o Paco Paz pola marxe dereita do río Barbaña e a nova senda do río Barbañica, xa executadas en xullo de 2024, agora terán continuidade accesible coa futura continuidade baixo a rúa das Camelias, a Molinera e a As Burgas ata comunicar coa Praza de Abastos.

Inicialmente estaba previsto a substitución do pavimento de madeira da pasarela existente no río Barbaña -detallou Manuel Pardo-  pero o estado da estrutura de vigas de madeira fixo inviable o aproveitamento polo que se tivo que pechar o paso temporalmente e actualizar unha nova pasarela de 13 metros de lonxitude en estrutura metálica e con pavimento de madeira.

Nesta liña, apuntou o representante do Goberno galego, que neste punto realizouse a pavimentación completa co redeseño de ramplas e pendentes para acadar unha accesibilidade que antes non tiña para favorecer a circulación peonil e ciclista. Así mesmo completarase con sinalización, actuacións na iluminación, implantación de arborado e mobiliario urbano.

Manuel Pardo lembrou tamén que as obras da senda do Barbaña forma parte dunha actuación conxunta, que supón un investimento autonómico de 5,4 M€, con outro traxecto que comunica a estación intermodal coa Ponte Vella a través da avenida de Caldas, xa finalizado nesta primavera pasada.