Lugo, 8 de outubro de 2025

O conselleiro de Sanidade, Antonio Gómez Caamaño, subliñou o investimento da Xunta de 3,2 millóns de euros no centro de saúde da Milagrosa para seguir avanzando na modernización da atención primaria da sanidade pública en Lugo e reiterou o compromiso de construír o centro do Sagrado Corazón cando o Concello poña os terreos do antigo colexio á disposición do Executivo galego.

O titular da carteira sanitaria, acompañado do delegado territorial da Xunta, Javier Arias, e do xerente da área sanitaria de Lugo, A Mariña e Monforte de Lemos, Ramón Ares, supervisou o inicio das obras de reforma do centro de saúde da Milagrosa.

O conselleiro detallou que as obras se prolongarán durante os vindeiros meses, nos que un equipo de 25 traballadores vai materializar unha transformación total do centro, que pasará a ser amplo, accesible, moderno e dotado con novos servizos para pacientes e profesionais.

Plan funcional

Segundo remarcou o conselleiro, a obra abrangue unha superficie de 1.600 m², que posibilitarán dotar este centro da rede do Servizo Galego de Saúde de seis consultas de medicina xeral e outras seis de enfermería.

Tamén terá dúas salas de docencia, un despacho para o traballador social, dúas salas polivalentes, unha sala de técnicas, unha de urxencias e unha para toma de mostras.

Ademais, mellorarase a área de admisión, incorporando novos espazos para o persoal, como unha sala de xuntas, salas de docencia ou vestiarios.

Gómez Caamaño remarcou que a reforma suporá importantes melloras na accesibilidade, tanto exterior como interior, cun ascensor para padiolas e a adaptación dos aseos. Xunto ao anterior, renovaranse as fachadas, o que posibilitará contar con luz  natural nas zonas de espera.

Novo modelo de atención sanitaria

O titular da carteira sanitaria incidiu en que os investimentos da Xunta na cidade de Lugo en materia sanitaria están a posibilitar un novo modelo de atención á saúde moito máis completo e avanzado.

Ao respecto, lembrou o investimento de 16 millóns de euros no Centro Integral de Saúde, infraestrutura que permitiu aliviar o traballo do centro de saúde da Milagrosa.

Tal e como explicou o conselleiro, antes da construción do CIS, A Milagrosa tiña 24.000 tarxetas sanitarias asignadas, e cando remate a reforma terá 8.000, con libre elección de centro por parte dos usuarios.

Esta reorganización asistencial que o Servizo Galego de Saúde está a levar a cabo fará posible máis servizos e unha asistencia moito máis cómoda e de maior calidade no centro de saúde da Milagrosa, para avanzar na mellora da atención primaria conforme á planificación establecida, que se completará coa construción do centro de saúde do Sagrado Corazón cando a Administración local poña á disposición os terreos necesarios.