Santiago de Compostela, 15 de outubro de 2025

O conselleiro de Sanidade, Antonio Gómez Caamaño, destacou esta tarde no Parlamento que a Xunta está a ultimar unha reordenación dos recursos humanos de atención primaria que permitirá reforzar a cobertura en centros de saúde como o de Ribeira.

Segundo explicou, o Servizo Galego de Saúde presentará, antes de que finalice o presente ano, un documento con medidas para facer fronte ás necesidades de persoal coas que conta o primeiro nivel asistencial da sanidade pública galega.

Durante a súa intervención, Gómez Caamaño remarcou que, pese ao déficit de profesionais, a asistencia sanitaria está plenamente garantida en Ribeira, ao tempo que agradeceu o labor dos profesionais que prestan o seu servizo nos centros da localidade.

“En Ribeira hai catro pediatras e os catro atenden no propio día, sen demora“, referiu a modo de exemplo o conselleiro.

Así,  destacou as medidas postas en marcha polo Executivo galego para atallar o problema da falta de médicos de familia e pediatras, coa reorganización asistencial mediante intersubstitucións e prolongacións de xornada, a dotación de novas prazas de difícil cobertura, ou a formación do 100 % das prazas MIR que o Ministerio de Sanidade lle acredita a Galicia.

Sobre este particular, o conselleiro salientou que os profesionais que remataron a súa residencia en Ribeira, o pasado mes de xullo, xa están prestando servizo no centro de saúde.

Gómez Caamaño lamentou unha vez máis que o Ministerio de Sanidade, que é quen conta coas competencias para paliar o déficit de facultativos do Sistema Nacional de Saúde, non adopte medidas efectivas para solucionar este problema, nin contemple as propostas que lle achegan as diferentes comunidades autónomas.

Neste senso, pechou a súa intervención reiterando que é preciso que o Goberno central  permita ampliar a idade de xubilación dos facultativos ata os 72 anos e tamén que se axilice a homologación dos títulos estranxeiros.