Santiago de Compostela, 20 de outubro de 2025

A directora xeral de Planificación e Reforma Sanitaria da Consellería de Sanidade, Sofía López Linares, inaugurou esta mañá as XVIII Xornadas de Saúde Perinatal e Reprodutiva, nas que salientou a importancia de incorporar a perspectiva de xénero en todos os ámbitos da atención sanitaria.

A Escola Galega de Administración Pública (EGAP) acolleu un acto no que López Linares puxo en valor a recente publicación da guía A Saúde das mulleres en Atención primaria, un documento de apoio que ten por obxectivo impulsar e mellorar, dun xeito integral, os servizos sanitarios que se ofrece ás mulleres galegas.

Nesta liña, a directora xeral remarcou o compromiso da Xunta coa atención á saúde sexual e reprodutiva das mulleres, avogando por achegar unha resposta sanitaria que se centre nas súas necesidades reais ao longo da vida.

Durante a súa intervención, a responsable sanitaria tamén destacou a calidade do programa científico desta xornada, na que se abordarán importantes temas como a lactación materna, a saúde menstrual, a educación afectivo-sexual no referido aos embarazos non desexados e as infeccións de transmisión sexual, ou os factores de morbilidade diferenciais entre homes e mulleres.

A xornada, organizada pola Dirección Xeral de Asistencia Sanitaria do Servizo Galego de Saúde, contou coa presenza de máis de 220 profesionais do Servizo Galego de Saúde, destacando a participación do persoal de enfermería (xinecoloxía e obstetricia), de enfermería familiar e comunitaria, e dos técnicos en coidados auxiliares de enfermería (TCAE).