Ourense, 22 de outubro de 2025

O delegado territorial da Xunta en Ourense, Manuel Pardo, salientou esta tarde que “ a UNED foi e é para moitas persoas unha porta aberta á formación e o coñecemento que lles permite, que nos permitiu, compaxinar a vida laboral e os estudos superiores cun dobre labor; o enriquecemento intelectual persoal e a opción á mellora no ámbito do traballo”.

Durante a súa asistencia ao acto de inauguración do curso universitario da UNED en Ourense, nunha cerimonia desenvolvida no Centro Cultural Marcos Valcárcel, o delegado territorial recoñece o papel da UNED como unha “aliada” na construción dunha provincia e unha Galicia “máis cohesionada, culta e preparada para o futuro” e animou a seguir estreitando lazos de colaboración para xerar oportunidades.

Manuel Pardo fixo fincapé no labor esencial desenvolvido “os avances sociais e políticos, a necesidade de formarse para acceder ao mundo laboral, a falta de sistemas convencionais adaptados para os cambios da vida actual e o imparable crecemento das ciencias da educación e da tecnoloxía fixeron posible o desenvolvemento da educación a distancia en todo o mundo”.

Deste xeito, reivindicou, así mesmo, o valor da educación como a porta de futuro da mocidade tanto a nivel profesional como persoal e destacou a importancia da Universidade Nacional de Educación a Distancia (UNED) “que posibilita a convivencia do rural e o universitario, crucial para contornas como a galegas e ofrece aos alumnos igualdade de oportunidades para acceder aos estudos”.

O delegado territorial da Xunta incidiu na idea constatada de que é necesario aprender durante toda a vida; “actualmente, a idea compartida e bastante xeneralizada é que a educación non se circunscribe ao período escolar, senón que sempre hai algo novo que aprender”. E esta circunstancia -aclarou Manuel Pardo- “de educación permanente marca un novo fito na educación e xera un novo panorama educativo xa que xorden novas situacións: persoas que deben combinar a súa vida persoal co estudo ou o seu traballo coa súa  formación. As estruturas convencionais, definitivamente, xa non podían dar resposta a esta idea”.

E o mérito -subliñou Manuel Pardo- é tanto do corpo docente como dos estudantes que con gran forza de vontade conseguen superar estudos e exames tras a xornada laboral, en moitas ocasións, e ao dispoñer de tempo libre tras concluír a vida laboral activa en moitas outras.

“Os procesos educativos non só transmiten coñecementos, senón que tamén constrúen valores, prácticas e normas sociais orientadas ao ben común”; mantivo o delegado territorial, por iso lembrou que foron moitas xeracións de ourensáns as que se formaron en UNED Ourense, polo que “é unha honra estar aquí celebrando a importancia da educación superior e da investigación universitaria no benestar do noso país”; rematou.