Santiago de Compostela, 29 de outubro de 2025

O conselleiro de Sanidade, Antonio Gómez Caamaño, salientou o compromiso da Xunta coa investigación no ámbito biomédico, ao que as contas de 2026 destinarán 80 millóns de euros.

Así o destacou na súa intervención no Foro Debate sobre os polos de excelencia de Galicia, organizado polo Club Financiero de Santiago, na mesa titulada Calidade da formación e a investigación.

Gómez Caamaño referiuse ao investimento en investigación  do Servizo Galego de Saúde e a Axencia de Coñecemento en Saúde, que con 31 millóns de euros previstos nos Orzamentos da Xunta do próximo ano experimenta un aumento de 33,5 %.

O conselleiro de Sanidade incidiu en que a aposta da Xunta pola investigación é incuestionable, posto que se dedicarán 49,1 millóns á Fundación Pública Galega Instituto de Investigación Sanitaria de Santiago de Compostela, á Fundación Pública Galega de Investigación Biomédica Inibic e á Fundación Pública Galega de Investigación Biomédica Galicia Sur. Isto supón 1,7 millóns máis para o vindeiro ano.

No mesmo sentido, Gómez Caamaño lembrou a aprobación da maior oferta de formación sanitaria especializada da historia de Galicia para o curso 2025-2026, con 682 prazas. A Xunta financia a formación dos futuros profesionais sanitarios con 94,2 millóns de euros nos orzamentos de 2026, o que representa un incremento do 11,5 % e no que se inclúe o financiamento das primeiras seis prazas da nova especialidade de medicina de urxencias e emerxencias.