Santiago de Compostela, 6 de novembro de 2025

O xerente do Servizo Galego de Saúde, José Ramón Parada, reivindicou esta mañá no Parlamento de Galicia o compromiso da Xunta co mantemento das infraestrutura sanitarias de toda a comunidade.

No marco da Comisión 5ª, de Sanidade, Política Social e Emprego, o responsable sanitario destacou que todos os centros da rede sanitaria pública galega son avaliados periodicamente por técnicos da administración, que se encargan de  comprobar se precisar dalgún tipo de mellora de tipo funcional ou estrutural.

En resposta a unha pregunta parlamentaria sobre o estado do centro de saúde de Vila de Cruces e o consultorio de Merza, Parada precisou que estas infraestruturas contan con diferentes titularidades pois, o centro de saúde cruceño é de titularidade compartida -entre o Concello e o Servizo Galego de Saúde-, mentres que o consultorio de Merza é de titularidade municipal.

Durante a súa intervención, o xerente do Servizo Galego de Saúde explicou que a Xunta realizou diversas actuacións de mellora no centro de saúde de Vila de Cruces (rampla de acceso, reformas do sistema de fontanaría, etc...) nas que o Executivo galego investiu máis de 36.000 euros.

Parada puntualizou que calquera tipo de reforma integral do edificio debe facerse “no marco dun convenio de colaboración co Concello”, tal e como prevé a normativa. Neste senso, reiterou a “plena disposición ao diálogo e á cooperación institucional”, do departamento sanitario da Xunta.

En canto ao consultorio de Merza, explicou que se trata dun inmoble de titularidade municipal e que o seu mantemento corresponde ao Concello. Pola súa banda, o Servizo Galego de Saúde debe garantir que os profesionais conten cos medios e o equipamento clínico necesario para ofrecer unha asistencia sanitaria de calidade.

O xerente do Sergas pechou a súa intervención comprometéndose a visitar o centro de saúde de Vila de Cruces e o consultorio de Merza co obxectivo de trasladar as súas demandas aos técnicos e aos responsables da atención primaria da área sanitaria de Santiago e Barbanza.