Vigo, 7 de novembro de 2025

O conselleiro de Sanidade, Antonio Gómez Caamaño, convidou aos médicos colexiados a participar no deseño do mellor modelo asistencial para garantir a atención sanitaria á cidadanía ante os retos da falta de facultativos e a oportunidade da innovación tecnolóxica.

O titular da carteira sanitaria da Xunta interveu no acto de homenaxe ao médico xubilado que organiza o Colexio Oficial de Médicos de Pontevedra, no que se homenaxea a 70 médicos e médicas, aos que o conselleiro agradeceu a súa traxectoria e compromiso exemplar.

Gómez Caamaño incidiu en que o Colexio Oficial de Médicos de Pontevedra é un referente do que saíron profesionais que engrandeceron o nome da medicina galega.

Na súa intervención, o máximo responsable da saúde da cidadanía galega puxo en valor o respecto que merecen todos os profesionais da sanidade, resultando inaceptable que poidan sufrir agresións de ningún tipo.

Ao respecto deste tema, Gómez Caamaño lembrou que a Xunta adquiriu un compromiso para reformar a Lei de Saúde de Galicia, elevando ao máximo rango normativo a protección fronte ás agresións ao persoal da sanidade. O conselleiro agarda que moi pronto haxa pasos adiante neste eido, posto que a seguridade deste colectivo é unha prioridade absoluta para o Executivo galego.