Santiago de Compostela, 13 de novembro de 2025

O director xeral de Comercio e Consumo, Gabriel Alén, asistiu en Santiago á xornada informativa sobre o novo sistema de facturación verificable Verifactu organizada pola Federación Galega de Comercio e Abanca e apoiada pola Xunta. Esta actividade enmárcase no convenio coa devandita federación, que ten como obxectivo impulsar a promoción comercial, ofrecer asesoramento e formación, e favorecer a dixitalización do sector.

Gabriel Alén resaltou a relevancia desta xornada de divulgación e formación sobre este sistema impulsado desde a Axencia Tributaria para garantir a transparencia e loitar contra o fraude fiscal. Destacou que este tipo de iniciativas contribúen a adaptar o comercio ás novas tecnoloxías e a fortalecer a colaboración entre distintos axentes, xerando sinerxías que beneficien ao sector, no marco do Plan estratéxico do comercio de Galicia 2025-2030.

Ademais, o director xeral aproveitou tamén para reafirmar o compromiso da Xunta co comercio de proximidade, con liñas de axudas específicas que incentivan especialmente a mellora de equipamento e a incorporación de software de cara á adaptación a este novo sistema de facturación.