Santiago de Compostela, 15 de novembro de 2025

Galicia, a través da Axencia Galega de Coñecemento en Saúde (ACIS), participou na localidade danesa de Aarhus nun obradoiro de intercambio de boas prácticas no uso de materiais téxtiles sanitarios xa que a maioría das emisións á atmosfera dos hospitais proceden de produtos como batas, máscaras e sabas.

No encontro participaron a coordinadora da estratexia de economía circular do Servizo Galego de Saúde, Beatriz Piñeiro, e o director da área de Desenvolvemento e Innovación sanitaria da Axencia Galega de Coñecemento en Saúde (ACIS), José María Romero. 

Unha das actividades foi a visita á lavandería do hospital de Aarhus, que é das máis verdes de Europa e aspira a ser en 2027 a lavandería para téxtiles sanitarios máis verde do mundo, implementando políticas de circularidade e sostibilidade.

Galicia é a única rexión española que  forma parte do proxecto europeo Interreg Europe CEMTex, que ten un orzamento de 1,7 millóns de euros e catros anos de duración.

Esta iniciativa ten como finalidade contribuír ao desenvolvemento dun modelo de consumo de materiais téxtiles médicos que cumpran de xeito óptimo cos requirimentos sanitarios comunitarios, coa intención de reducir as emisións de carbono e de materiais sobrantes varios.

Unha das problemáticas centrais que se identificaron no proxecto é o modelo de materiais téxtiles sanitarios dun único uso.

O último ano do proxecto CEMTex, 2029, desenvolverase un proxecto piloto baseado no coñecemento adquirido nos anos previos polo grupo.

O socio coordinador é a provincia de Gelderland (Holanda). Ademais, forman parte activa deste proxecto socios de varios países europeos: Rexión Central de Dinamarca (Dinamarca), Next Technology Technotessile (Italia), Axencia de Desenvolvemento Rexional do Nordeste (Romanía), Hospital Emile Mayrisch (Luxemburgo), Clúster Technical Téxtiles (República Checa), Axencia de Desenvolvemento Rexional da Rexión de Lugansk (Ucraína).