Santiago de Compostela, 19 de novembro de 2025

A Xunta reforza a colaboración co Concello de Folgoso do Courel para a humanización do acceso a Fondo de Vila. A conselleira de Vivenda e Planificación de Infraestruturas, María M. Allegue, xunto co secretario xeral técnico, Yago Borrajo, asinou coa alcaldesa deste municipio lucense, Dolores Castro, o convenio para a concesión dun préstamo por un importe de 90.185 euros do Fondo de Cooperación da Xunta para municipios de menos de 50.000 habitantes.

En concreto, a través deste préstamo, os traballos que se abordarán consistirán na habilitación da vía V1 proposta no Plan xeral de ordenación urbana municipal (PXOM), para ampliar o acceso aos servizos e dotacións municipais, como son o albergue, o edificio de usos múltiples ou o museo.

Coa finalidade de humanizar o acceso a Fondo de Vila, a través desta intervención proponse construír unha calzada única sostida en parte sobre un muro de contención, unha coieira coroada con varandas de madeira, buscando a harmonía co territorio.

A intervención desenvolverase mediante esta iniciativa da Xunta que está destinada a financiar obras de conservación de patrimonio, rexeneración urbana ou adquisición de inmobles para rehabilitar en municipios con poboación máis pequena. Este préstamo sen xuros, a devolver en 8 anos, correspóndese á convocatoria 2025 desta liña de achegas, dotada dun total de 3,7M€.

Ademais, cómpre lembrar  que a Xunta e o Concello de teñen xa asinado un acordo ao abeiro do Plan Hurbe para financiar esta actuación, que suporá un orzamento total de preto de 300.000 euros, e na que a Xunta asume o 70% do seu orzamento.