Santiago de Compostela, 20 de novembro de 2025

O secretario xeral da Lingua, Valentín García, salientou hoxe a “relevante contribución” do fenómeno do Xacobeo “á difusión da lingua e cultura galegas”. Fíxoo na presentación da publicación Argonautas no labirinto, coa que Fernando García Calderón gañou o III Premio Novela Camiño de Santiago.

Nesta liña, o representante da Consellería de Cultura, Lingua e Xuventude puxo en valor este certame, organizado pola Academia Xacobea  coa colaboración da Xunta, como “impulsor da rica realidade cultural de Galicia”, á vez que como “un eficaz medio para fomentar o diálogo e o intercambio cultural a través de distintos xéneros literarios”.

Neste senso, Valentín García estableceu similitudes entre este premio coa experiencia de percorrer o Camiño, “no que entran en contacto persoas de diferentes procedencias e países, que teñen a oportunidade de coñecer a nosa lingua e cultura”. A este respecto, celebrou “o impulso que está a recibir o noso idioma” a través da literatura e da programación cultural en galego, que se desenvolve nos territorios polos que discorren as diferentes rutas xacobeas.

A obra galardoada, que será publicada pola Editorial Galaxia, é un thriller histórico que se serve do popular xogo da Oca e que demanda a construción colaborativa no relato por parte dos lectores, e da que o xurado valorou a súa prosa depurada e áxil. O autor, Fernando García Calderón (Sevilla, 1959), conta cunha longa traxectoria literaria que inclúe tanto libros de relatos como novelas, cos que ten sido distinguido cos Premio Félix Urabayen e o de Novela Ateneo de Valladolid, entre outros.