A Xunta lanza a segunda edición da FP acelerada con 506 prazas para cursar 23 ciclos de xaneiro a xullo

O conselleiro de Educación, Ciencia, FP e Universidades pechou a xornada de difusión desta nova modalidade formativa na que tres alumnos relataron a súa experiencia persoal

A Xunta lanza a segunda edición da FP acelerada con 506 prazas para cursar 23 ciclos de xaneiro a xullo

Román Rodríguez anima aos interesados a mellorar a súa cualificación a través desta iniciativa pioneira en España que o Goberno galego impulsa este ano de xeito novidoso

O prazo para presentar as solicitudes, que se tramitan a través do Portal Educativo, estará aberto ata o día 18 de decembro

Trátase dunha modalidade de formación concentrada nun período de entre catro e seis meses que permite un acceso rápido ao mercado laboral

Ao abeiro desta acción formáronse xa 153 persoas na primeira fase que arrancou en setembro e remata agora en decembro

En 12 concellos de Galicia poden cursarse programas en sectores con alta demanda como agraria, comercio, edificación, mecánica, enerxía, hostalaría ou transporte

Santiago de Compostela, 3 de decembro de 2025

A Xunta de Galicia vén de lanzar a segunda edición da FP Acelerada con 506 prazas dispoñibles para cursar un total de 23 ciclos formativos en 16 centros integrados das catro provincias de xaneiro a xullo. O prazo para presentar as solicitudes estará aberto ata o día 18 de decembro e os interesados deben realizar os trámites a través do Portal Educativo.

Así se expuxo hoxe con motivo da xornada de difusión desta nova modalidade formativa pioneira en España que clausurou o conselleiro de Educación, Ciencia, Universidades e FP, Román Rodríguez. O encontro abriuno a directora xeral de FP, Eugenia Pérez, e nel interviron para contar a súa experiencia tres alumnos que cursaron esta formación na primeira quenda de setembro a decembro que remata agora.

O titular de Educación aproveitou o encontro para animar “aos mozos e aos non tan mozos” a aproveitar esta nova vía formativa para mellorar a súa cualificación e, deste xeito, ampliar o seu futuro profesional e persoal. Román Rodríguez explicou que a FP Acelerada é unha modalidade de formación rápida, concentrada nun período de entre catro e seis meses de duración, en función do ciclo de que se trate, que representa “unha dobre vantaxe” para alumnos e empresas. “Por unha banda, as persoas dispoñen dunha vía rápida de formación para ao acceso ao mercado laboral e, por outra, as empresas teñen un aceso máis áxil a persoal cualificado, sobre todo naqueles sectores onde hai máis demanda”, explicou.

Balance da primeira quenda

Na primeira quenda que arrancou en setembro e que conclúe en decembro houbo un total de 153 matrículas. Debido a ser unha modalidade piloto de nova implantación pensada para determinados grupos de poboación e, polo tanto, aínda pouco coñecida, a Xunta confía en que se irá asentando ano a ano, ao igual que sucedeu con outras iniciativas novidosas no seu día como foron os másteres de FP ou os títulos de alta especialización.

Esta modalidade, enmarcada no Plan FPGal360, inclúe tanto a formación no centro educativo como na empresa, e por tanto permiten que as persoas acaden, nun corto período de tempo, unha certificación profesional. O obxectivo último é mellorar a cualificación das persoas e abrirlles as portas ao mercado laboral en sectores concretos que precisan profesionais para traballar.

A través da FP Acelerada ofértanse un total de 23 programas en sectores con alta demanda de emprego como son Agraria, Comercio, Edificación e obra civil, Enerxía e auga, Fabricación mecánica, Industria alimentaria, Hostalaría e turismo e Transporte e mantemento. A oferta está dispoñible en 16 centros integrados de FP de 12 concellos.

TÍTULOS DA SEGUNDA EDICIÓN DA FP ACELERADA

*GB: grao básico; GM: grao medio; GS: grao superior

· Provincia da Coruña

Concello	Centro	Ciclo	Prazas
A Coruña	CIFP Paseo das Pontes	GM Servizos en restaurante	22
A Coruña	CIFP Someso	GM Cubertas e impermeabilizacións	22
A Coruña	CIFP Someso	GS Planificación e supervisión da área de carrozaría de vehículos automóbiles	22
Ferrol	CIFP Ferrolterra	GM Fabricación de tubaxes e construcións e carpintaría metálica	22
Ferrol	CIFP Ferrolterra	GM Montaxe de instalacións de tubaxes e construcións e carpintaría metálica	22
Pontedeume	CIFP Fraga do Eume	GM Repostaría en restauración	22
Ribeira	CIFP Coroso	GS Control de calidade na industria alimentaria	22
Ribeira	CIFP Coroso	GS Xestión loxística e comercial na industria alimentaria	22
Santiago de Compostela	CIFP Compostela	GM Servizos en restaurante	22
Santiago de Compostela	CIFP Politécnico de Santiago	GM Montaxe de instalacións de tubaxes e construcións e carpintaría metálica	22

Provincia de Lugo

Concello	Centro	Ciclo	Prazas
Lugo	CIFP As Mercedes	GM Mantemento do motor de combustión interna e os seus sistemas auxiliares referente aos vehículos automóbiles	22
Lugo	CIFP As Mercedes	GM Preparación, protección e embelecemento de superficies de carrozarías	22
Ribadeo	CIFP Porta da Auga	GM Preparación, protección e embelecemento de superficies de carrozarías	22

Provincia de Ourense

Concello	Centro	Ciclo	Prazas
Ourense	CIFP A Farixa	GS Organización e proxectos de instalacións solares fotovoltaicas	22
Ourense	CIFP A Farixa	GS Organización e proxectos de instalacións solares térmicas	22
Vilamarín	CIFP de Vilamarín	GB Actividades básicas do departamento de pisos	22

Provincia de Pontevedra

Concello	Centro	Ciclo	Prazas
Pontevedra	CIFP Carlos Oroza	GB Venda en panadaría e pastelaría	22
Pontevedra	CIFP Carlos Oroza	GM Servizos en restaurante	22
Pontevedra	CIFP Montecelo	GB Operacións auxiliares e/ou básicas referentes ao mantemento e a reparación de vehículos automóbiles na área de carrozaría	22
Vigo	CIFP Manuel Antonio	GM Servizos en bar e cafetaría	22
Vigo	CIFP Valentín Paz Andrade	GM Mantemento dos sistemas de forza e trens de rodaxe referente a vehículos automóbiles	22
Vigo	CIFP Valentín Paz Andrade	GM Preparación, protección e embelecemento de superficies de carrozarías	22
Vilagarcía de Arousa	CIFP Fontecarmoa	GB Actividades auxiliares de almacenaxe	22