Santiago de Compostela, 23 de xullo de 2026

O comisario do Xacobeo 2027, Marcos Gómez Román, mantivo hoxe un encontro institucional co reitor da Universidade da Coruña (UDC), Ricardo Cao, co obxectivo de avanzar na preparación do Xacobeo 2027 e explorar posibles vías de colaboración que favorezan a implicación da comunidade universitaria na programación do Ano Santo.

Durante a reunión, celebrada no Reitorado da UDC, ambas institucións coincidiron na conveniencia de promover iniciativas conxuntas que contribúan a achegar os valores do Xacobeo ao ámbito universitario, fomentando a participación activa do estudantado, do persoal docente e investigador e do persoal de administración e servizos nas actividades que se desenvolvan con motivo da celebración do Ano Santo.

Marcos Gómez Román destacou o papel que desempeñan as universidades galegas como espazos de coñecemento, innovación e difusión cultural, sinalando que a súa implicación será clave para enriquecer a programación do Xacobeo 2027 desde unha perspectiva académica, científica e social.

A reunión serviu tamén para establecer unha canle de diálogo permanente entre ambas institucións que permita concretar nos próximos meses proxectos de interese común, aproveitando o potencial docente, investigador e de transferencia de coñecemento da Universidade da Coruña para contribuír á proxección do Xacobeo 2027 dentro e fóra de Galicia.

A xuntanza deu continuidade á rolda de contactos do comisario do Xacobeo 2027 coas universidades galegas despois de que esta mesma semana se reunise coa reitora da Universidade de Santiago de Compostela, Rosa M. Crujeiras.