Lugo, 9 de decembro de 2025

O conselleiro de Educación, Ciencia, Universidades e FP, Román Rodríguez, e a conselleira do Medio Rural, María José Gómez, asistiron hoxe á XIV Gala de Danza a prol de UNICEF organizada polo Conservatorio Profesional de Danza de Lugo. Acompañados polo delegado territorial da Xunta en Lugo, Javier Arias, os representantes do Goberno galego puxeron en valor o talento e profesionalidade do alumnado destas ensinanzas e resaltaron o seu compromiso coa defensa dos dereitos da infancia.

Nesta gala, que ten como finalidade recadar fondos destinados aos programas de UNICEF, participaron uns 130 estudantes. Concretamente, os do grao elemental presentaron a peza titulada Dentro de min, mentres que os de 5º e 6º de grao profesional ofreceron diversas coreografías de danza clásica, contemporánea e do obradoiro de danza galega, poñendo de manifesto o seu gran potencial.