Santiago de Compostela, 8 de xaneiro de 2026

A Xunta prevé que a obra de mellora do abastecemento a Ribadeo e Trabada, que beneficiará a unha poboación potencial de preto de 10.000 habitantes, se adxudique no primeiro semestre deste ano. Así llo trasladou a conselleira de Medio Ambiente e Cambio Climático, Ángeles Vázquez, ao alcalde de Ribadeo, Daniel Vega, con quen mantivo unha reunión esta mañá para abordar este e outros asuntos de interese municipal no marco das súas competencias.

Cómpre lembrar que Augas de Galicia sacou a licitación pública esta actuación o pasado mes de outubro, por un importe de case 7,5 millóns de euros e un prazo de execución de 15 meses. Tras indicar que se recibiron un total de 20 ofertas para acometer a obra, a responsable autonómica explicou que o procedemento de tramitación avanza segundo o previsto e que, de feito, se acaba de proceder á apertura do sobre B, polo que se estima que antes do mes de xuño haberá unha proposta de adxudicación.

O obxectivo desta actuación é corrixir o deterioro da rede de abastecemento existente —construída fai 40 anos— así como as avarías e roturas que sofre e que impiden que se poida garantir a cobertura da demanda de auga actual. Por iso, a conselleira subliñou a importancia dunha actuación que implicará executar unha nova rede de abastecemento que atravesará ambos concellos e mellorará o subministro de auga potable na zona, sobre todo no caso de Ribadeo.

Para tal fin, o investimento da Xunta, a través de Augas de Galicia, será do 80% —con cofinanciamento da UE a través do Fondo Europeo de Desenvolvemento Rexional (Feder) 2021-2027— mentres o Concello de Ribadeo asumirá o 20% restante e o de Trabada, porá á disposición os terreos necesarios para a execución das obras.

Esta actuación enmárcase na colaboración tanto técnica como económica que mantén desde hai anos Augas de Galicia cos concellos —que son os competentes en materia de abastecemento, saneamento e depuración— para contribuír a profesionalizar a xestión da auga, garantir o bo estado ecolóxico dos ríos e das rías de Galicia e a mellorar a calidade duns servizos que son básicos para a cidadanía.

De feito, ese compromiso coas administracións locais reflíctese tamén nos orzamentos deste ano, cun orzamento global de Augas de Galicia de 151,7 millóns de euros (un 5,5% máis que en 2025) dos que 7 de cada 10 euros se destinarán a abastecemento e saneamento —108,7 millóns de euros— e case a metade —73,6 millóns de euros—, especificamente a investimentos para mellorar ou construír infraestruturas hidráulicas.

Por outra banda e tamén en materia de augas, a conselleira e mais o alcalde de Ribadeo abordaron a situación de varias parroquias do municipio con relación ao seus sistemas de saneamento de augas residuais.

Ao respecto e como posible solución a algunhas das necesidades expostas, Ángeles Vázquez lembrou que Augas de Galicia convocará a comezos de 2026, entre outras, dúas ordes de axudas para apoiar, por un lado, a instalación de sistemas de depuración autónomos en núcleos rurais illados e, por outro, a renovación deste tipo de instalacións en vivendas unifamiliares. Neste sentido, animou ao alcalde a consultar as bases da próxima convocatoria e solicitar acollerse á primeira destas liñas de axudas como solución alternativa para avanzar na mellora da depuración no concello.