Chantada (Lugo), 21 de xaneiro de 2026

O conselleiro de Sanidade, Antonio Gómez Caamaño, anunciou hoxe a incorporación de Chantada, Carballedo, Quiroga e Ribas de Sil ao servizo de Hospitalización a Domicilio, acadando, deste xeito, o 98 % da poboación do distrito de Monforte de Lemos e ao redor do 95 % na provincia de Lugo, e dando un paso máis para acadar o obxectivo de cubrir a totalidade dos concellos galegos.

O titular da carteira sanitaria da Xunta, acompañado do xerente da área sanitaria de Lugo, A Mariña e Monforte de Lemos, Ramón Ares, anunciou a posta en marcha dun novo equipo de Hospitalización a Domicilio no transcurso da súa visita ao centro de saúde de Chantada, onde trasladou aos profesionais o compromiso da Xunta coa sanidade pública deste municipio.

Respecto da ampliación do servizo de HADO, Gómez Caamaño referiu que poder ofrecerlles aos pacientes e ás súas familias coidados hospitalarios complexos desde o seu propio fogar é un factor de calidade e de humanización que fai máis grande o noso sistema sanitario público.

A constitución dun segundo equipo de hospitalización a domicilio ao distrito sanitario de Monforte de Lemos vai permitir unha reorganización do traballo para ampliar a cobertura.

Respecto do primeiro equipo xa existente no hospital de Monforte de Lemos, formado por un médico e tres enfermeiros, ofrecía axuda á poboación dos concellos de Monforte de Lemos, Bóveda, A Pobra de Brollón, Pantón, Sober e O Saviñao, atendendo ao redor de 260 pacientes. Agora, con este segundo equipo, a cobertura chegará a máis de 43.000 persoas, cun incremento de 15.000 usuarios.

Para este incremento, contarase cun médico máis e outras tres enfermeiras. Tamén se habilitou un novo vehículo para cubrir os desprazamentos.

Con esta nova prestación, o conselleiro incidiu en que a sanidade pública de Chantada e do distrito sanitario de Monforte de Lemos é máis completa e máis próxima á cidadanía grazas ao esforzo compartido dos alcaldes, dos profesionais sanitarios e do Executivo galego.

Melloras no centro de saúde e no PAC

Tal e como detallou o conselleiro, a Xunta realizou neste centro de saúde e no PAC obras de mellora por importe de 100.000 euros. Entre elas sinalou a nova consulta de admisión e da sala de espera no PAC, ademais da remodelación da área de admisión e fisioterapia, así como a instalación de baños adaptados no centro de saúde.

Engadido ao anterior, dotouse ao centro de saúde de dúas cadeiras de brazos para odontoloxía e impulsouse a renovación do equipamento de fisioterapia e a dixitalización da sala de radioloxía. Tal e como demandou o alcalde, valoraranse as novas necesidades.

O conselleiro tamén incidiu na importancia de atención primaria como elemento vertebrador da sanidade pública. Concluíu que todos estes investimentos forman parte da aposta da Xunta pola mellora dos servizos sanitarios.