Santiago de Compostela, 6 de febreiro de 2026

A Dirección Xeral de  Saúde Pública da Consellería de Sanidade considera que a onda estacional de gripe xa finalizou, ao manterse durante dúas semanas consecutivas o nivel basal de intensidade.

O departamento sanitario galego vén de publicar, na súa páxina web, o informe de actividade das infeccións respiratorias agudas correspondente á quinta semana do ano, que rematou o día un deste mes.

No informe sinálase que a taxa de consultas diminuíu un 32 % respecto á semana previa e fica en 16,8 por 100.000 habitantes. O descenso produciuse en todos os grupos de idade, destacando a diminución do 69,1 % no grupo de 0 a 4 anos. Por áreas sanitarias, a taxa de consultas tamén descendeu en todas elas.

No referente aos ingresos por gripe, ingresaron 65 persoas, un 34 % menos que na semana anterior (99 ingresos). A taxa de ingresos foi de 2,4 por 100.000 habitantes. O descenso produciuse en todos os grupos de idade. Por áreas sanitarias, non se observou ningún aumento da taxa.

No que vai de tempada, notificáronse 4.076 ingresos, a maioría deles (4.060) con virus de tipo A.

A rede de farmacias sentinela que colabora coa Consellería de Sanidade traslada que, na última semana, as taxas de dispensa de antigripais descendeu un 20,2 %, mentres que a de probas de antíxenos se mantivo estable.

En canto á porcentaxe de positividade das mostras estudadas para virus do tipo A, na semana obxecto do informe foi do 5,4 %, o que supón un descenso respecto da anterior (7,6 %).

Esta situación seguirase a monitorizar durante a tempada de virus respiratorios, co fin de detectar cambios relevantes.