Santiago de Compostela, 15 de febreiro de 2026

Un total de 5.678 alumnos recibiron axudas económicas da Xunta para facer as prácticas de FP no último curso. A Consellería de Educación, Ciencia, Universidades e FP destinou un orzamento total de máis de 1 M € a esta acción, a través da que se sufragan parte dos gastos de desprazamento dos alumnos.

Deste xeito, facilítase o desenvolvemento das prácticas por parte do alumnado, fundamentais para acadar unha formación da máxima calidade, tanto na comunidade autónoma como no resto de España e mesmo noutros países de dentro ou fóra da Unión Europea. Favorécese así a mobilidade nacional e internacional das persoas que desexan formarse no estranxeiro, o que permite a mellora das competencias lingüísticas e profesionais.

Cómpre lembrar que, a maiores desta liña de axudas, a Xunta faise cargo da xestión da cotización das prácticas do alumnado de FP para que non repercutan neles nin nas empresas. O pasado curso beneficiáronse 16.572 estudantes, cun investimento de case 700.000 €.

Nova convocatoria

Unha vez resoltas as axudas do pasado curso, o Goberno galego vén de convocar as deste ano, cun orzamento de 1 M €, susceptible de incrementarse en función das solicitudes. A convocatoria establece, como é habitual, dúas modalidades en función dos destinatarios.

Na modalidade A, destinada a quen realice a formación en empresa dentro do territorio español, a contía da axuda depende de onde se realicen as prácticas e do número de xornadas. O máximo da axuda neste caso é de 375 €. O alumnado que faga a formación práctica en Galicia pode recibila só cando o concello do centro de traballo non sexa o mesmo que o concello do centro educativo ou o de residencia do estudante durante ese período.

Na modalidade B, dirixida ao alumnado que realice a formación en empresa fóra do territorio español, a contía das axudas varía en función do país de destino. Deste xeito, establécese unha contía por semana de entre 100 € e 175 € dependendo do custo da vida do país escollido.

Como novidade, este ano a tramitación da orde permitirá que o alumnado coñeza de antemán as axudas ás que poderá acceder. Pode solicitar as bolsas o alumnado matriculado en ciclos de grao básico, medio ou superior, máster de FP, ensinanzas profesionais de artes plásticas e deseño, ensinanzas deportivas de réxime especial e programas formativos, públicas ou con concerto.

Dous prazos de presentación

As solicitudes presentaranse no centro educativo onde o alumnado estea matriculado no momento de realizar a formación en empresa. A documentación será facilitada polo centro educativo en que estea matriculado no momento de realizar a formación en empresa.

Establécense dous períodos de presentación de solicitudes. O primeiro, ata o 30 de xuño de 2026, vai dirixido aos estudantes que realicen o seu período formativo na empresa ata o 31 de agosto de 2026. O segundo prazo, comprendido entre o 13 de outubro e o 13 de novembro de 2026, é para os que fagan as prácticas no período setembro-decembro de 2026.