Santiago de Compostela, 4 de marzo de 2026

 O seguimento da folga de facultativos de atención primaria convocada pola organización sindical O’Mega na quenda de tarde deste mércores foi do 4,91 % nos centros sanitarios da comunidade galega.

Por áreas sanitarias, o seguimento na área sanitaria da Coruña e Cee foi do 2,78 %; na de Ferrol, do 2,78%; na de Santiago de Compostela e Barbanza, do 2,63 %; na de Ourense, Verín e O Barco de Valdeorras, 1,49 %; na de Pontevedra e O Salnés, 7,14 %; e na de Vigo, 12,50 %. Na área de Lugo, A Mariña e Monforte de Lemos a folga non rexistrou seguimento na quenda de tarde.

O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.

Como consecuencia da folga de facultativos de atención primaria convocada pola organización sindical O’Mega na xornada do martes 3 de marzo, foron suspendidas no conxunto de Galicia 5.745 consultas de atención primaria. Así, nos dous primeiros días de folga, luns e martes, suspendéronse en total 11.264 consultas.

A Consellería de Sanidade insta a O'Mega a sumarse ao acordo maioritario sobre atención primaria para evitarlles a pacientes e profesionais os efectos dun paro indefinido.