O seguimento na quenda de mañá da folga de facultativos de atención primaria acada o 4,77 % na Sanidade Pública Galega
A Consellería de Sanidade insta ao sindicato O'Mega a sumarse ao acordo maioritario sobre atención primaria para evitarlles a pacientes e profesionais os efectos dun paro indefinido
Santiago de Compostela, 6 de marzo de 2026
O seguimento da folga de facultativos de atención primaria convocada pola organización sindical O’Mega na quenda de mañá deste venres foi do 4,77 % nos centros sanitarios da comunidade galega.
Por áreas sanitarias, o seguimento na área sanitaria da Coruña e Cee foi do 5,57 %; na de Ferrol, 3,13 %; na de Santiago de Compostela e Barbanza, 4,62 %; na de Lugo, A Mariña e Monforte de Lemos, 2,86 %; na de Pontevedra e O Salnés, 4,74 %; e na de Vigo, 9,05 %. Non contou con seguimento na de Ourense, Verín e O Barco de Valdeorras.
O Servizo Galego de Saúde conta na xornada de hoxe coa cobertura do 100 % dos servizos mínimos, garantindo a actividade asistencial urxente e de emerxencias.
Como consecuencia da folga de facultativos de atención primaria convocada pola organización sindical O’Mega entre as xornadas do luns, do martes, do mércores e do xoves suspendéronse 22.118 consultas en Galicia.
A Consellería de Sanidade insta a O'Mega a sumarse ao acordo maioritario sobre atención primaria para evitarlles a pacientes e profesionais os efectos dun paro indefinido.
