Santiago de Compostela, 11 de marzo de 2026

O conselleiro de Sanidade, Antonio Gómez Caamaño, sinalou hoxe no Parlamento as melloras retributivas ofertadas aos médicos de urxencias como unha proba máis da capacidade da Xunta de escoitar e acordar cos profesionais sanitarios.

Tal e como detallou o titular de Sanidade no Pazo do Hórreo, as melloras supoñen unha media de 3.560 euros máis ao ano para cada profesional médico de urxencias, que se suma aos aumentos salariais aprobados para os empregados públicos.

As melloras abranguen un incremento progresivo do importe que perciben por cada hora de xornada complementaria que realizan, así como percibir as retribucións correspondentes á noite dos venres co importe correspondente ás noites pre-festivas.

Sanidade tamén se comprometeu a modificar o cómputo do réxime de descansos do persoal médico de urxencias hospitalarias para aplicarlles os mesmos criterios que se acorden para o persoal dos puntos de atención continuada (PACs).

Reforzo das urxencias

O conselleiro incidiu en que a Xunta leva anos reforzando a capacidade das urxencias hospitalarias para responder axeitadamente ás necesidades asistenciais. Ao respecto, Gómez Caamaño subliñou que, na actualidade, hai 149 prazas máis de médicos de urxencias no Sergas que no ano 2024.

Tamén puxo en valor que Galicia foi quen liderou a demanda das comunidades autónomas para a creación da especialidade de medicina de urxencias. Neste senso, nesta primavera o Sergas comezará a formar os primeiros médicos desta especialidade.

Gómez Caamaño incidiu en que o sistema sanitario galego respondeu con eficacia ao desafío asistencial da presión asistencial dos meses de inverno ocasionada polos virus respiratorios. Neste punto, puxo en valor o traballo dos profesionais das urxencias hospitalarias, da atención primaria, dos PAC, da hospitalización a domicilio, do transporte sanitario, do persoal de enfermería, do persoal non sanitario e dos equipos directivos das áreas sanitarias.

Así mesmo, e grazas á planificación do departamento sanitario galego, a capacidade hospitalaria do Sergas chegou este inverno ás 7.007 camas, o que representa 250 máis que no inverno anterior.

O máximo responsable do Sergas dixo que a Xunta seguirá a avaliar de forma permanente, con datos reais e da man dos profesionais, as necesidades que teñen os servizos de urxencias hospitalarias.

Para concluír a súa intervención, Gómez Caamaño incidiu en que, mentres a Xunta dialoga cos profesionais e chega acordos de mellora das súas condicións, o Ministerio de Sanidade négase a escoitar aos facultativos, o que está a provocar unha espiral de folgas médicas que están a provocar a suspensión de 133.000 actos médicos entre decembro e febreiro, co conseguinte impacto nos tempos de acceso á sanidade por parte dos pacientes.