Lugo, 12 de marzo de 2026

Lugo acollerá do 13 ao 19 de xullo o I Torneo Internacional de Xadrez Fuxan os Ventos, organizado pola Escola Luguesa de Xadrez dentro dos actos conmemorativos do seu 30º aniversario. A Xunta colabora coa iniciativa.

O delegado territorial, Javier Arias, participou hoxe na presentación das actividades xunto co presidente da agrupación que impulsa o evento, Pablo Castro, e membros doutras entidades implicadas.

A organización destaca que se trata dunha cita de primeiro nivel que reunirá xogadores de distintos países e situará a cidade no mapa mundial do xadrez. As competicións desenvolveranse no auditorio Fuxan os Ventos.

O torneo repartirá importantes premios e será válido para a obtención de normas de Mestre Internacional e Gran Mestre Internacional, así como para o ránking internacional. As oito primeiras partidas retransmitiranse en directo, e tamén se poderán consultar en tempo real os resultados dos demais encontros.

O programa inclúe unha visita guiada para que os participantes teñan ocasión de coñecer a cidade de Lugo. Ademais da competición, promoverase o Xuño Axedrecístico, con actividades gratuítas abertas á cidadanía en diferentes espazos emblemáticos da cidade.

Arias felicitou á entidade organizadora por todos estes anos de traxectoria “inculcando a afección polo xadrez entre moitas xeracións de lucenses”. Subliñou ademais a dimensión turística desta iniciativa, que servirá para promocionar a cidade entre todos os asistentes.