Santiago de Compostela, 13 de marzo de 2026

A directora xeral de Traballo Autónomo e Economía Social, Marta Mariño, participou hoxe na praza de abastos de Santiago na inauguración da actividade Espazos efémeros de emprendemento e tamén visitou os postos das 9 cooperativas participantes nesta iniciativa. Trátase dunha actividade impulsada pola Asociación Galega de Cooperativas Agroalimentarias (Agaca) enmarcada no proxecto transfronteirizo ES-Factory, de cooperación Galicia–Norte de Portugal e cofinanciado polo Fondo Europeo de Desenvolvemento Rexional (FEDER) no marco do programa Interreg VI A España – Portugal (Poctep) 2021-2027.

Alí puxo de relevo esta acción orientada a promover a innovación comercial e a fortalecer proxectos empresariais do ámbito do cooperativismo e que permite ás entidades participantes expoñer e promocionar os seus produtos agroalimentarios nun espazo de grande visibilidade, de maneira totalmente gratuíta. Ademais de hoxe e mañá, esta actividade terá continuidade os días 8, 9, 22, 23, 29 e 30 de maio. Dentro deste proxecto tamén se enmarca a aceleradora de economía social Xunta Impulsa, que acolle o polo de emprendemento de Vilanova de Arousa e que se desenvolverá ata o mes de abril. Trátase dunha iniciativa de formación e asesoramento que se completa con sesións de mentoría especializada.