Quiroga (Lugo), 15 de marzo de 2026

A conselleira do Medio Rural, María José Gómez, acompañada polo director da Axencia Galega da Calidade Alimentaria, Martín Alemparte; polo director de Turismo de Galicia, Xosé Merelles; e polo delegado territorial da Xunta en Lugo; Javier Arias; asistiu hoxe á celebración da 26ª edición da Mostra do Aceite de Quiroga, onde destacou o crecente potencial do sector olivícola en Galicia.

A Consellería colabora coa celebración deste evento, declarado festa de interese turístico de Galicia, na que se promocionan os produtos de calidade diferenciada. Neste sentido, explicou que a produción de aceite é unha das normas técnicas incluídas dentro do selo Artesanía Alimentaria, a través do cal se certifica a elaboración, manipulación e transformación dos produtos alimentarios de xeito artesanal.

A maiores, a conselleira explicou que desde o seu departamento estase a traballar para favorecer o desenvolvemento das variedades autóctonas de oliveira en Galicia. A través da Axencia Galega de Calidade Alimentaria, participa en dúas iniciativas encamiñadas a avanzar neste sentido.

Este mesmo ano iniciarase a produción de plantas certificadas como variedades autóctonas na Estación Experimental Agrícola de Baixo Miño, en Salceda de Caselas, co obxectivo de que os produtores poidan dispoñer delas e seguir estudándoas. En concreto, empregaranse catro destas variedades, das cales hai unha que xa está identificada xeneticamente como única en Galicia polo Banco Mundial de Xermoplasma.

Neste senso, a titular de Medio Rural reafirmou a aposta do Goberno galego pola innovación e a investigación para o desenvolvemento da actividade económica no rural, neste caso mediante o sector olivícola, que ten especial relevancia na área de Quiroga.