Ourense, 18 de marzo de 2026

O conselleiro de Sanidade, Antonio Gómez Caamaño, destacou esta tarde en Ourense a importancia estratéxica do termalismo como ferramenta de saúde preventiva, ademais de como motor económico, social e cultural de Galicia.

Durante a súa intervención na inauguración das II Xornadas de Termalismo da Escola Universitaria de Enfermería de Ourense, o responsable autonómico sinalou que este recurso natural permite conxugar a tradición médica dentro dun enfoque sanitario máis integral; unha mestura que facilita acadar o benestar físico e dar resposta á fatiga crónica e ao estrés.

O titular de Sanidade explicou que, nunha sociedade caracterizada pola velocidade e a constante esixencia, o termalismo contribúe dun xeito significativo á recuperación do equilibrio físico e mental.

A Consellería de Sanidade está a avaliar diferentes vías de colaboración coa Deputación Provincial de Ourense para facilitar o acceso aos balnearios como ferramenta de saúde preventiva. Apuntou, a este respecto, que se contempla a posibilidade de incorporar programas de termalismo provincial aos Plans Locais de Saúde da Consellería naqueles municipios que conten con estas instalacións ou se atopen próximos a elas.

O titular de Sanidade definiu a provincia de Ourense como unha "terra privilexiada" ao concentrar unha das maiores densidades de augas termais de Europa. Este feito posiciona Galicia como o principal destino termal de toda España. 

A Organización Mundial da Saúde (OMS) recoñeceu en 1986 o termalismo como unha ferramenta terapéutica clave, especialmente para pacientes con enfermidades crónicas ou en procesos de recuperación funcional. Entre os beneficios contrastados, está a mellora do descanso, o alivio de dores óseas e musculares ou a axuda ao sistema respiratorio.

No peche da súa intervención, o conselleiro de Sanidade agradeceu á Escola Universitaria de Enfermería a organización destas xornadas e reafirmou o compromiso do Servizo Galego de Saúde coa investigación e o coñecemento científico neste ámbito para ofrecer respostas de saúde máis completas á cidadanía.