Tui (Pontevedra), 23 de marzo de 2026

O delegado territorial da Xunta en Pontevedra, Agustín Reguera, visitou esta mañá o resultado dos traballos de reforma do ascensor do IES San Paio, no concello de Poio.

Os traballos foron posibles grazas a unha achega da Xunta de preto de 32.000 euros e permitiron mellorar a accesibilidade do edificio. Trátase dunha obra especialmente importante para dar servizo ao profesorado e alumnado con mobilidade reducida e que agora goza dunha maior autonomía e comodidade.

O delegado territorial aproveitou a visita para lembrar o compromiso da Xunta coa educación pública e o mantemento dunhas instalacións educativas “accesibles para todo o mundo”.

Plan de nova arquitectura pedagóxica

O Goberno galego ten un compromiso coa renovación e adaptación dos colexios e institutos ás necesidades do século XXI ao abeiro do Plan de nova arquitectura pedagóxica.

Esta folla de ruta abrangue tanto as partidas anuais para as grandes obras en execución, como a construción de novos centros ou rehabilitacións integrais, así como intervencións de pequena e mediana envergadura que adoitan acometerse nos meses de verán (reformas de baños, pequenas melloras de accesibilidade, obras de humanización, tarefas de pintura ou arranxos de patios, entre outras).