Silleda (Pontevedra), 25 de abril de 2026

As probas da fase de oposición que se celebran esta tarde no Recinto Feiral Internacional de Silleda para o acceso ás categorías de enfermería familiar e comunitaria e de enfermería do traballo acadaron unha porcentaxe de participación do 81 %.

Nestas especialidades estaban convocadas un total de 870 aspirantes, acudindo á realización das probas 679 dos 838 admitidos na especialidade de enfermería familiar e comunitaria (81 % de participación), e 26 aspirantes dos 32 inscritos na especialidade de enfermería do traballo (81,2 % de participación).

Entre as peculiaridades deste procedemento, destaca a realización da proba desde o Hospital Arquitecto Marcide de Ferrol, por parte dunha opositora ingresada por embarazo.

Nesta quenda vespertina, o departamento sanitario da Xunta oferta 128 prazas de enfermería familiar e comunitaria e 3 prazas de enfermería do traballo.

Participación do 85 % na quenda de mañá

Os procesos selectivos para acceder ás 2.476 prazas que o Servizo Galego de Saúde oferta nesta primavera comezaron hoxe á mañá, co desenvolvemento das probas de acceso ás especialidades de enfermería obstétrico-xinecolóxica e de enfermería pediátrica.

Dun xeito conxunto, os exames destas categorías rexistraron unha participación do 84,95 %, aos que se presentaron 474 opositores dos 558 que estaban admitidos.

Máis polo miúdo, para a realización das probas de enfermería obstétrica-xinecolóxica (matrón/a) estaban inscritas un total de 348 persoas, acudindo ao exame 293 aspirantes (participación 84,20 %).

No que atinxe ás probas da fase de oposición da categoría de enfermería pediátrica, acudiron á realización do exame 181 dos 210 opositores admitidos (86,19 % de participación).

Máis de 7.000 aspirantes convocados para o domingo

Durante a xornada de mañá domingo, e en quenda de tarde, desenvolveranse os exames para acceder ás 236 prazas ofertadas na categoría de Persoal de Servizos Xerais (PSX).

Neste caso, un total de 7.056 aspirantes están chamados á realización dunhas probas das que 10 prazas estarán reservadas á quenda de discapacidade intelectual.

Ademais, o vindeiro 9 de maio o Recinto Feiral Internacional de Silleda acollerá a realización das probas para o acceso a categoría profesional de enfermería no sistema sanitario público galego. Un proceso no que están admitidos 8.661 persoas para acceder a 1.980 prazas.

A Xunta agradece o traballo desenvolvido polo persoal do Servizo Galego de Saúde, as Forzas e Corpos de Seguridade, Protección Civil, a Autopista Central de Galicia (ACEGA), 061, Cruz Vermella e o persoal da Fundación Semana Verde de Galicia, que posibilitaron que as probas transcorreran, unha vez máis, con total normalidade.

O Goberno galego mantén a súa aposta pola estabilización dos profesionais do Servizo Galego de Saúde desenvolvendo, durante dúas fins de semana desta primavera, as probas para a acceder a preto de 2.500 prazas do sistema sanitario público galego.

ANEXO: PERSOAS ADMITIDAS POR CATEGORÍA E PRAZAS OFERTADAS