Santiago de Compostela, 29 de abril de 2026

A organización da Festa do Melindre e da Repostería Tradicional da Terra de Melide e o Concello de Melide colaboran, un ano máis, coa Axencia de Doazón de Órganos e Sangue (ADOS) agasallando aos doantes de sangue con este doce típico.  As persoas que acudan a doar este mércores 29 de abril ata a unidade móbil da Praza Maior de Lugo ou o xoves 30 na zona do Cantón-Obelisco na Coruña poderán degustar doces típicos da repostería local de Melide.

Esta iniciativa, ademais de agasallar a solidariedade dos doantes, tamén quere por en valor esta festa e convidar á cidadanía a que se achegue os vindeiros 9 e 10 de maio ata Melide e participar nela.

Ademais, tamén se distribuirán doces entre os doantes que participen na campaña de doazón que se desenvolverá o mércores 6 de maio na Praza Roja de Santiago de Compostela e o venres 8 de maio en Melide.

Concello solidario

A Axencia salienta o elevado nivel de concienciación da cidadanía melidense a prol da doazón de sangue xa que, no ano 2024, recolléronse un total de 660 doazóns de sangue neste municipio coruñés, o que supuxo acadar unha taxa de participación de 85 doazóns por cada 1.000 habitantes e ano, un dos índices máis elevados de toda Galicia.

A ADOS quere amosar o seu agradecemento á organización da Festa e ao Concello de Melide a súa colaboración e apoio ás iniciativas destinadas a promover a doazón de sangue, tanto nesta campaña especial como no resto de visitas efectuadas ao longo do ano polas unidades móbiles da Axencia.

Para máis información, ADOS dispón do portal web: ados.sergas.gal, as redes sociais, e o teléfono gratuíto: 900 100 828, para resolver calquera dúbida relacionada coa doazón de sangue ou coñecer a data dos desprazamentos das unidades móbiles.