Xove (Lugo), 30 de abril de 2026

A conselleira de Economía e Industria, María Jesús Lorenzana, anunciou esta mañá que a Xunta aprobará antes do verán a ampliación do parque empresarial de Xove, coa previsión de que no ano 2027 se poidan licitar as obras de urbanización.

Lorenzana mantivo hoxe un encontro con empresarios e empresarias da zona, para informarlles de primeira man sobre este proxecto e sobre as políticas do Goberno galego en materia de solo industrial.

A ampliación do parque empresarial de Xove permitirá duplicar a súa superficie ata roldar os 200.000 m². Increméntase así, a súa extensión nun 85,6 % para poñer 93.700 m² máis á disposición das empresas cun investimento de case 4 millóns de euros.

Ademais, a conselleira destacou que, ao mesmo tempo e co obxectivo de axilizar os prazos, a Xunta está traballando de xeito paralelo na licitación da expropiación dos terreos. Ao ser tantos os trámites, explicou, o que a Administración autonómica está facendo é simultanealos. “Mentres imos traballando para que se aprobe definitivamente o Peose, queremos ter xa o proxecto de expropiación para ao longo deste ano poder rematala”, apuntou.

A titular de Economía e Industria emprazou aos empresarios presentes na reunión e futuros propietarios a trasladar as necesidades que teñen para que as parcelas estean adaptadas ao que precisan. “Queremos dar seguridade, garantías e información de como imos avanzando cos prazos”, asegurou, para destacar que “é a época da Xestur en que máis actuacións e máis millóns de metros cadrados se están mobilizando en toda Galicia”.

Máis solo industrial

A ampliación do polígono de Xove complementa outros desenvolvementos urbanísticos de solo empresarial que está a promover a Xunta en Lugo como son o parque do Corgo, Meira ou As Gándaras. En total, nesta provincia están en proceso de tramitación ou urbanización 1,5 millóns de metros cadrados de polígonos industriais.