Santiago de Compostela, 10 de maio de 2026

A Xunta propón aos centros educativos un programa de actividades sobre astronomía e exploración do ceo que permitirá acreditar ao alumnado como guías escolares da eclipse solar total que terá lugar no mes de agosto e que será especialmente visible en Galicia. Para obter este certificado, os estudantes recibirán formación sobre este fenómeno a través do programa Polos Creativos e terán que pasar varios retos vinculados ao ámbito da astronomía.

Esta iniciativa, que leva por título Polos eclipsados, enmárcase nas accións que a Consellería de Educación, Ciencia, Universidades e FP pon a disposición da comunidade escolar grazas á programación Galicia explora o ceo. Camiño da eclipse. O alumnado desde 5º e Primaria ata 4º da ESO poderá recibir a formación necesaria para obter o carné que o acreditará para operar como guía da eclipse para as súas familias, amigos e veciños.

Para iso, os colexios e institutos que desexen participar poden inscribirse ata o 29 de maio a través da convocatoria lanzada no Portal Educativo. Accederán a material específico así como ás instrucións con todas as probas do programa. Os equipos estarán formados por clases completas ou por grupos de varios alumnos e un docente.

Tres misións, incluída unha maqueta 3D

Para obter o certificado astronómico, o alumnado terá que pasar varias probas. Unha delas é un cuestionario con preguntas sobre a eclipse, logo de recibir formación na aula sobre este fenómeno e dípticos coa información precisa. A segunda proba obrigatoria será a realización dunha maqueta sobre a eclipse con impresoras 3D. E a terceira misión necesaria será escoller unha das actividade propostas no programa, relacionadas coa monitorización da eclipse, as constelacións ou a exploración espacial empregando o material dos Polos Creativos ou propoñer un reto propio. O alumnado que complete as actividades recibirá o seu carné de guía e unhas gafas de observación segura.

Pezas de audio e vídeo, xogos, simulacións...

Ademais do certificado astronómico, o programa Polos Eclipsados propón retos STEM, actividades que supón un chanzo máis no nivel dos traballos e os equipos que se inscriban neste capítulo optarán a premios. Neste caso, os proxectos presentados polos centros resolverán retos de comunicación e divulgación científica sobre astronomía, astrofísica ou exploración espacial, así como didáctica das ciencias do espazo.

Poderán presentarse en formato maqueta, simulacións, pezas de audio e vídeo, xogos ou presentación. Tamén poderán vincularse con aspectos artísticos, resaltando os valores culturais, estéticos e poéticos da ciencia, a tecnoloxía, a enxeñaría ou as matemáticas, sendo o rigor científico un elemento irrenunciable en todas as actividades presentadas.

Dos traballos presentados seleccionaranse ata 20 e os colexios gañadores recibirán, como premio, material complementario de Polos Creativos, desde sets de ferramentas, ata monitores de alta definición, pantallas de 75``, impresoras 3D ou mobiliario.

Cada centro poderá presentar varios equipos pero, no caso de resultar seleccionado, o recoñecemento será único para todos. Os galardóns e agasallos entregaranse nun evento final que se celebrará a final de curso no que os equipos amosarán os seus traballos.