Santiago de Compostela, 13 de maio de 2026

O secretario xeral para o Deporte, Roberto García, compareceu hoxe a petición propia na Comisión 1ª do Parlamento de Galicia para dar conta da colaboración da Xunta coas federacións deportivas galegas, un modelo baseado nos convenios que facilitan a estabilidade financeira e a capacidade de planificación destas entidades ao garantir unha maior axilidade de tramitación. Neste liña, destacou que a Xunta destina este ano máis de 5,5 millóns de euros ás federacións deportivas, unha contía que medrou máis dun 17% nos últimos catro anos, desde os 4,7 millóns presupostados en 2023.

Roberto García incidiu na eficacia do sistema galego de colaboración coas federacións deportivas, sustentado na figura do convenio, o que permite que as entidades dispoñan dunha importante parte do seu orzamento xa nos primeiros meses do ano. Neste marco, o secretario xeral para o Deporte salientou tamén o avance progresivo nos anticipos das axudas, que pasaron do 40% no ano 2014 ao máximo actual do 90%, facilitando así a liquidez e a planificación da actividade deportiva federada

No que vai de ano, a Secretaría Xeral para o Deporte ten xa tramitados convenios con 57 federacións deportivas por importe de 5,29 millóns de euros, o que representa o 96% da partida destinada a esta finalidade no presente 2026. Deste xeito, a programación e a tramitación anticipada do gasto supón unha vantaxe competitiva para as federacións galegas fronte a outras comunidades autónomas.

Igualdade, inclusión e loita contra a violencia

Durante a súa intervención, o secretario xeral lembrou que as federacións deportivas son o eixo principal da actividade deportiva competitiva galega e subliñou que Galicia conta actualmente con 61 modalidades e máis de 300 especialidades deportivas. Ademais, salientou que os convenios incorporan medidas vinculadas á igualdade, á inclusión, á transparencia e, como novidade neste ano, á loita contra a violencia no deporte.

A maior parte das axudas ás federacións, máis de 2,5 millóns de euros, dedícanse ao financiamento da actividade deportiva ordinaria. Entre as actuacións financiadas inclúense así mesmo o labor dos centros de tecnificación e dos núcleos de adestramento deportivo especializado (NADE), a participación das seleccións autonómicas nos campionatos de España, os programas de promoción deportiva ou a preparación de deportistas galegos cara aos Xogos Olímpicos dos Ánxeles 2028.

O secretario xeral para o Deporte subliñou que os convenios asinados pola Xunta coas federacións, a través da Secretaria Xeral para o Deporte, ascenden desde o ano 2009 a preto de 80 millóns de euros e fixo fincapé no destacado papel que as federacións deportivas desenvolven no conxunto do sistema deportivo galego. Lembrou así que Galicia se sitúa por riba da media estatal tanto en porcentaxe de poboación federada como en licenzas femininas. Atendendo aos últimos datos do Consello Superior de Deportes, sinalou que o 11,1% da poboación galega conta con licenza deportiva federativa fronte ao 8,9% da media estatal, mentres que as licenzas femininas representan en Galicia o 27,2% fronte ao 23,2% nacional.