Madrid, 22 de maio de 2026

O conselleiro de Emprego, Comercio e Emigración, José González, acompañado pola directora xeral de Formación e Cualificación para o Emprego, Zeltia Lado, mantivo esta mañá un encontro coa secretaria xeral de Formación Profesional do Ministerio de Educación, Formación Profesional e Deportes, Esther Monterrubio, no que reclamou ao Goberno maior flexibilidade na xestión dos fondos de formación para impulsar unha experiencia piloto de microformacións formais de Grao A con clústeres estratéxicos galegos, unha iniciativa que na actualidade non permite o marco vixente.

Concretamente, o conselleiro trasladou a proposta de que unha parte dos fondos finalistas transferidos ás comunidades autónomas poida empregarse para que o propio tecido produtivo adapte a formación ás súas necesidades de cualificación, apostando por accións formativas breves e áxiles que permitan avanzar na cualificación e recualificación da poboación activa. A este respecto, sinalou que Galicia xa conta cun caso de éxito nesta liña, financiado con fondos do Mecanismo de Recuperación e Resiliencia e  centrado nese caso en formacións de carácter non formal. Este modelo permitiu, na súa última edición, capacitar arredor de 17.000 persoas mediante microformacións deseñadas directamente polos sectores produtivos, entre eles a automoción, as enerxías renovables, o metal ou as TIC.

González incidiu, non obstante, en que a actual rixidez na xestión dos fondos finalistas dificulta o despregamento deste tipo de iniciativas, especialmente no relativo á obrigatoriedade de impartición exclusiva por entidades acreditadas ou ás restricións á subcontratación, o que limita a participación directa dos clústeres e axentes sectoriais na organización e coordinación das accións formativas. Así mesmo, puxo de relevo que estas restricións non se axustan nin á realidade do tecido produtivo galego nin ás recomendacións da Unión Europea, que avoga por sistemas máis flexibles, áxiles e adaptados ás necesidades reais das empresas e das persoas traballadoras.

Na reunión, o titular de Emprego tamén trasladou a necesidade de que o Estado actualice as contías das bolsas e axudas destinadas ás persoas desempregadas participantes en accións formativas, que levan 18 anos sen revisión, malia os cambios no contexto socioeconómico, e que na actualidade non cobren os custos reais de desprazamento nin as diferenzas derivadas da dispersión territorial de Galicia, o que dificulta o acceso á formación en igualdade de condicións.

O Executivo galego puxo tamén o foco na conveniencia de incrementar o financiamento das horas prácticas que as empresas destinan á formación, co obxectivo de mellorar a implicación do tecido produtivo e reforzar a eficacia das accións formativas.

Redeseño das políticas activas de emprego

José González enmarcou estas propostas na aposta da Xunta por un modelo de formación para o emprego máis útil, flexible e conectado co mercado laboral, baseado na colaboración coas empresas e orientado á mellora da inserción laboral e á adaptación constante das competencias profesionais ás necesidades dos sectores produtivos.

Neste contexto, cómpre destacar que a Xunta vén de redeseñar completamente a orde de Accións Formativas para Persoas Desempregadas (AFD), dotada con 60 M€ tras a recente ampliación de crédito de 20 millóns, así como outras ferramentas á carta como Galicia Suma Talento (8,5 M€) e os Bonos Talento Empresa (2,2 M€), cuxa convocatoria se publica hoxe no Diario Oficial de Galicia (DOG). Ademais, xa está en vigor o novo decreto de microcredenciais para o traballo.