Valdoviño (A Coruña), 23 de maio de 2026

A conselleira de Medio Ambiente e Cambio Climático, Ángeles Vázquez, puxo hoxe en valor o investimento de máis de 180.000 euros por parte da Xunta para garantir a preservación da biodiversidade na lagoa da Frouxeira, no Concello de Valdoviño.

Durante unha visita que fixo a conselleira esta mañá a este humidal, Ángeles Vázquez subliñou o compromiso da Xunta coa protección do patrimonio natural da Comunidade e incide en que a Comunidade é un “referente verde e sostible” a nivel europeo. “A nosa riqueza ambiental é o mellor exemplo da Galicia Calidade”, incidiu a conselleira.

Nese senso, Ángeles Vázquez puxo as actuacións que se están levando a cabo na lagoa da Frouxeira como exemplo dese compromiso. En concreto, a conselleira visitou hoxe o paso peonil onde se está a instalar un valado de madeira para protexer a fauna silvestre do tránsito de persoas e animais domésticos. Esta varanda, que estará lista nas vindeiras semanas logo dun investimento de 52.000 euros, delimitará unha ampla área de máis dun quilómetro de lonxitude.

Esta actuación completarase no verán coa instalación de postes de madeira para acordoar as dunas de Frouxeira e a praia de Vilarrube co obxectivo de regular o acceso dos visitantes e de animais domésticos a estes espazos que, segundo explicou a conselleira, son de grande interese para a conservación da píllara das dunas.

Estas dúas medidas, que suman un orzamento global de preto de 130.000 euros, forman parte do Plan para a restauración e posta en valor dos humidais galegos, que a Xunta está a desenvolver cun investimento de 4,1 millóns de euros.

Nesa liña, a conselleira lembrou que ao abeiro dese plan, xa se levaron a cabo varias accións neste municipio coruñés. En concreto, retirouse a barreira artificial de rocas na lagoa da Frouxeira para diminuír o impacto das inundacións e fixéronse traballos de erradicación da zarzaparrilla nunha superficie de 2,15 hectáreas da praia de Pantín co obxectivo de protexer a camariña, que é unha especie autóctona dese espazo e cómpre protexela. Estas dúas accións supuxeron un investimento de máis de 51.000 euros.

Para concluír, Ángeles Vázquez salientou que a lagoa da Frouxeira é un dos lugares de maior diversidade de Galicia, tanto pola presenza de hábitats naturais e seminaturais de especial relevancia, como polo importante número de especies da fauna e flora protexidas. De feito, é considerada unha Zona Húmida de Importancia Internacional pola Convención Ramsar.