Ferrol, 23 de maio de 2026

O Plan de conservación da píllara das dunas impulsado pola Xunta no ano 2014 está a dar importantes froitos en Galicia, onde xa hai contabilizadas un total de 87 parellas reprodutoras en toda a súa costa, segundo o último censo da especie elaborado pola Universidade de Santiago en 2025.

Durante unha visita á praia ferrolá de San Xurxo, onde nidifica esta especie catalogada como vulnerable e considerada todo un símbolo dos areais galegos, a conselleira de Medio Ambiente e Cambio Climático, Ángeles Vázquez, explicou que, grazas ao labor de seguimento e protección dos niños e ás actuacións de conservación e investigación que desenvolven tanto dentro como fóra das praias os técnicos e axentes ambientais do seu departamento, coa colaboración da Universidade de Santiago, a realidade é que, nestes momentos, a píllara das dunas presenta unha tendencia positiva na Comunidade.

De feito, a poboación galega de píllara das dunas é, xunto coa das Illas Baleares, a única en todo o país que experimenta e mantén un crecemento progresivo, segundo os datos recollidos no último Libro Vermello das Aves en España.

Esta evolución é posible, en parte, grazas á aposta que fixo a Xunta no ano 2017 por un programa para a conservación e cría ex-situ —é dicir, fóra do seu hábitat natural— destas pequenas aves. Segundo explicou, a iniciativa considérase hoxe en día “unha experiencia única en toda Europa” e no marco da mesma xa se logrou que voasen con éxito un total de 178 polos incubados de forma artificial e posteriormente criados nos centros de recuperación de fauna autonómicos de Oleiros e Cotobade.

Este programa, ademais, enmárcase no proxecto europeo IBERALEX para mellorar a conservación da píllara das dunas como ferramenta para compatibilizar usos humanos e biodoversidade no espazo tranfronteirizo entre Galicia e Portugal.

Cun orzamento global de 1,9 millóns de euros, cofinanciado ao 75% con fondos europeos FEDER, o obxectivo deste proxecto (que se desenvolverá ata finais deste ano) é dar un paso máis no compromiso con esta especie e na conservación das praias e zonas húmidas ibéricas coa execución dunha serie de medidas e accións nas que colaboran a Xunta, a USC e outras institucións académicas e conservacionistas de España e Portugal.

Tras lembrar que a píllara das dunas está nestes momentos en pleno ciclo reprodutivo —xa que o período de cría nas praias vai do mes de marzo ao de agosto—, a responsable autonómica insistiu na importancia de seguir facendo un seguimento activo destas aves e de compatibilizar o uso recreativo e público dos areais nesta época do ano co respecto ás zonas de cría e á biodiversidade.

Por iso, ademais de facer un chamamento á prudencia cando se visite algunha das praias nas que haxa presenza de píllaras en período de cría, explicou que, este ano e só na provincia da Coruña, o seu departamento mantén monitorizados máis de 60 niños en 18 areais, dos cales o 80% foron protexidos mediante perímetros de protección.

Así mesmo, tamén avanzou que, polo momento, o persoal da Consellería de Medio Ambiente e Cambio Climático xa tivo que rescatar 11 niños ameazados polas pleamares vivas para poder trasladalos aos centros de Oleiros (nove) e de Cotobade (dous).

San Xurxo, referente para a especie

A píllara das dunas é unha ave limícola de pequeno tamaño e característica da costa galega, especialmente das praias das provincias da Coruña e Pontevedra, que está incluída no Catálogo galego de especies ameazadas na categoría de vulnerable.

Na actualidade, a costa Ártabra galega destaca como un importante núcleo de cría para esta especie, sendo a zona máis setentrional da súa distribución na costa cántabro-atlántica española. En particular, a praia de San Xurxo que visitou hoxe a conselleira é un areal de referencia e en 2025 nidificaron nela 7 das 16 parellas localizadas nesta zona.

Ademais, moitos dos exemplares que agora crían nas praias ártabras proceden, precisamente, do programa de cría ex-situ da Xunta e nestes momentos xa se poden observar varias familias de píllara das dunas en crecemento na costa da Coruña e de Pontevedra, un dato que confirma a efectividade das medidas de protección que se están a desenvolver en Galicia e a importancia de seguir concienciando á cidadanía.