O Porto do Son (A Coruña), 29 de maio de 2026

O conselleiro de Presidencia, Xustiza e Deportes, Diego Calvo, asistiu esta mañá ao Campionato Provincial de Cros para Centros Escolares da Coruña, onde destacou a importancia do programa de deporte escolar Xogade como unha ferramenta que permite que miles de nenos e nenas galegos descubran o deporte desde idades temperás e incorporen hábitos saudables para toda a vida.

A competición, que se desenvolveu no campamento xuvenil Virxe de Loreto do Porto do Son, contou coa participación de 630 escolares das categorías benxamín, alevín, infantil e cadetes procedentes de preto de 90 centros educativos de toda a provincia, que se clasificaron para a proba nas fases intercomarcais previas das zonas da Coruña, de Ferrol, de Noia e de Santiago

Diego Calvo lembrou que o programa Xogade, posto en marcha na temporada 2009/10, chega actualmente a preto do 60% do alumnado galego, superando os 143.000 participantes, e agradeceu a colaboración de agrupacións deportivas escolares (ADE), centros educativos, ANPAS, clubs e federacións deportivas á hora de promover o deporte entre os escolares. Ademais, o programa impulsa a participación feminina, que acada practicamente a paridade, con case un 48% de rapazas inscritas no deporte escolar.

O titular de Deportes incidiu no éxito de medidas como o seguro deportivo gratuíto para menores de entre 6 e 16 anos ou o investimento en transporte para garantir a participación en igualdade de condicións do alumnado de toda Galicia, especialmente do rural. Subliñou que na presente temporada 2025/2026, o seguro gratuíto chega xa a 40 federacións deportivas, coa integración da Federación de Deporte Adaptado, e supón un investimento global próximo aos 4 millóns de euros como mostra do compromiso da Xunta coa promoción dunha vida activa e saudable e co deporte base, alicerce do deporte de alto rendemento e de futuros campións.