Forcarei (Pontevedra), 4 de agosto de 2026

O delegado territorial da Xunta en Pontevedra, Pablo Fernández, visitou esta mañá o campamento de conciliación do concello de Forcarei, que está financiado coas axudas do Plan Corresponsables da Xunta, cofinanciado polo Plan Corresponsables do Ministerio de Igualdade, destinadas a favorecer a conciliación da vida familiar, persoal e laboral.

Durante a visita, Fernández destacou a importancia deste tipo de programas para “ofrecer alternativas de lecer aos máis pequenos durante a época de vacacións, á vez que se facilita a conciliación familiar”.

O delegado territorial lembrou que a Xunta destina este ano un total de 7,4 millóns de euros ao desenvolvemento de programas de conciliación en toda Galicia. Desta contía, 6,5 millóns de euros están dirixidos ás iniciativas impulsadas polos concellos, mentres que 600.000 euros se destinan ás actividades organizadas polas ANPAS e 300.000 euros a proxectos promovidos por entidades sociais.

No caso da provincia de Pontevedra ao redor de 30 concellos resultaron beneficiarios destas axudas, cun investimento próximo ao millón de euros.

Pablo Fernández salientou que estas achegas permiten aos concellos poñer en marcha ou reforzar servizos como o coidado profesional de menores en espazos públicos, campamentos, programas de madrugadores, obradoiros lúdicos ou actividades culturais, “actividades que son de gran utilidade para as familias e que ademais fomenta a socialización dos máis pequenos”.