Viveiro (Lugo), 6 de agosto de 2026

A directora xeral de Enerxías Renovables e Cambio Climático, Paula Uría, acompañou hoxe ás rapazas e rapaces que participan no campamento da Xunta no Albergue Xuvenil de Area, en Viveiro, durante a realización de distintas accións enmarcadas na iniciativa Van polo Clima e animounos a converterse en axentes activos fronte ao cambio climático e o coidado medioambiental.

Enmarcada no programa Mocidade polo Clima (impulsado pola Consellería de Medio Ambiente e Cambio Climático a finais do ano 2024 para formar e promover a acción climática entre o colectivo que vai dos 3 aos 35 anos), Van polo Clima é unha iniciativa de divulgación e formación, de carácter itinerante, que percorre diferentes puntos de Galicia cada verán co fin de inculcar entre a xente moza prácticas sostibles que contribúan a mitigar os efectos do quecemento global e fomenten hábitos responsables no día a día.

Este ano, a directora xeral explicou que, entre os meses de xuño e agosto, estará presente nun total de 16 campamentos de ocio e tempo libre e campos de voluntariado da Xunta, dirixidos a nenos e xente moza de diferentes idades, mentres que durante as fins de semana tamén se prevé a súa presenza nalgúns dos principais festivais de música estivais que se celebran en Galicia.

De feito, a furgoneta rotulada da Van polo Clima xa estivo no Son do Camiño (Santiago de Compostela), no PortAmérica (Portas), no Atlantic Fest (Vilagarcía de Arousa) e no Morriña Fest (A Coruña) e a finais deste mes de agosto tamén se desprazará ata o Festival da Luz, que se celebra en Boimorto.

No que levamos de verán, Van polo Clima chegou xa a máis de 6.300 mozas e mozos asistentes a algún destes festivais aos que se sumarán os asistentes ao Festival da Luz (cunha estimación de máis de 1.600 participantes). A maiores, prevese que arredor de 1.500 rapazas e rapaces participen tamén no conxunto de accións planificadas nos campamentos e campos de voluntariado, polo que a previsión do departamento autonómico é superar o balance do ano pasado e consolidar esta acción como unha fórmula de divulgación ambiental de éxito, baseada na participación, o xogo e a interacción directa coa mocidade.

En particular, no caso do campamento xuvenil que se celebra esta semana no albergue de Area, unha das accións que se realizou e contou coa participación de Paula Uría foi o Clima en Xogo, actividade lúdica por equipos na que as rapazas e rapaces tiveron que responder a unha batería de 65 preguntas sobre cambio climático, vagas de calor e incendios forestais, incluíndo tamén cuestións concretas sobre Galicia.

De igual xeito, a iniciativa Van polo Clima busca tamén fomentar entre as novas xeracións prácticas respectuosas coa contorna e sostibles en todos os ámbitos, desde as tarefas rutineiras da vida diaria ata actividades de lecer, como poden ser os festivais musicais ou os campamentos de verán.