Santiago de Compostela,  7 de agosto de 2026

A Consellería de Vivenda e Planificación de Infraestruturas, adxudicou por un importe de 379.757,70 euros a execución das obras  de humanización da rúa Vázquez Estévez, no concello de Arbo.

Esta intervención, adxudicada á empresa Explotacións Medioambientais, S.L.U., enmárcase no Plan Hurbe, co que a Xunta colabora cos concellos no financiamento da dotación de equipamentos públicos ou a mellora de contornas urbanas, co fin de mellorar a calidade de vida dos veciños.

O contrato adxudicado ten como finalidade acondicionar a rúa Vázquez Estévez para convertela nun espazo máis humano, cómodo e seguro para os desprazamentos a pé da veciñanza. As obras contarán cun prazo estimado de execución dun seis meses e consistirán na reordenación da rúa para gañar espazos para os peóns, limitando o tráfico aos residentes e vehículos de emerxencia.

Os traballos incluirán a ampliación do espazo destinado aos peóns, a renovación do pavimento, e a mellora da accesibilidade e a eliminación de barreiras arquitectónicas. Ademais, con estas obras reforzarase a seguridade viaria.

Nesta intervención, tamén se delimitarán as zonas de aparcadoiro, renovaranse as redes de saneamento e abastecemento e instalaranse novos puntos de luz.

De acordo ao convenio asinado entre a Xunta e o Concello no marco do Plan Hurbe, a Xunta asumirá o 70 % do investimento total das intervencións, e a Administración local o 30 % restante.