Pontevedra, 19 de agosto de 2026

O Río Verbena Fest celebra esta semana a súa quinta edición consolidado como unha das citas musicais do verán en Pontevedra. Os días 21 e 22 de agosto, a explanada exterior do Recinto Feiral acollerá dúas xornadas de concertos cunha programación que combina música, ocio e artistas de diferentes xeracións. O festival conta co apoio da Xunta de Galicia a través dos Concertos do Xacobeo, o programa impulsado por Turismo de Galicia para reforzar a música en directo como atractivo cultural e turístico e favorecer a súa distribución por todo o territorio.

O comisario do Xacobeo 2027, Marcos Gómez Román, participou esta mañá na presentación do festival e destacou que "o Río Verbena demostra a capacidade dos eventos musicais para atraer visitantes e xerar actividade económica no territorio". Neste sentido, lembrou que os establecementos hoteleiros da cidade e da contorna acadaron nas edicións anteriores o 100% de ocupación durante a súa celebración. "Son datos que amosan como a música en directo contribúe a reforzar o atractivo turístico das cidades galegas e a dinamizar a súa actividade durante a tempada estival", sinalou.

O representante da Xunta puxo tamén en valor a evolución do festival e a súa capacidade para reunir "artistas consolidados e novos nomes, dando visibilidade ao talento galego e ofrecendo unha programación capaz de conectar con públicos de diferentes xeracións". Así mesmo, destacou o papel dos Concertos do Xacobeo para "estender e descentralizar a oferta musical galega e apoiar eventos con capacidade para dinamizar os distintos territorios".

Un cartel para diferentes xeracións

O Río Verbena Fest presenta este ano un cartel que transita polo pop, o indie e o rock e reúne referentes consolidados da escena estatal con artistas e proxectos emerxentes. A primeira xornada, o venres 21 de agosto, contará coas actuacións de Siloé, La La Love You, Sidonie, Luis Fercán, Sarria, Cora, Müntrails e Apolo 18, ademais da sesión de Señora DJ.

O sábado 22 será a quenda de Xoel López, Love of Lesbian, Carlos Ares, Sanguijuelas del Guadiana, León Benavente, Yoly Saa, Los Acebos e French Riviera, xunto coa sesión de Sergio el Indio DJ.

A programación incorpora tamén unha importante presenza de artistas galegos, reforzando a conexión do festival coa escena musical do país e compartindo escenario con formacións e artistas de ampla traxectoria no panorama estatal.

Música tamén no centro da cidade

O festival estende o seu ambiente máis aló do recinto principal a través das Sesións Verbeneiras, unha programación de acceso gratuíto na praza de Méndez Núñez que achega a música ao centro urbano de Pontevedra.

As sesións comezaron onte martes con Desconcerto e continúan hoxe mércores con Mamasunción e Four Passengers, completando a programación previa ás dúas xornadas principais do festival. Deste xeito, o Río Verbena suma novas propostas á oferta cultural da cidade durante a semana do festival.

Os Concertos do Xacobeo, un mapa sonoro diverso e plural

A Xunta de Galicia continúa firme na súa aposta por situar a comunidade galega como destino turístico de grandes eventos musicais a través dos Concertos do Xacobeo, un programa amplo e plural impulsado por Turismo de Galicia que dá cobertura a todas as grandes e máis singulares citas e espectáculos musicais da comunidade, con máis de 185 festivais, ciclos e concertos imprescindibles en máis de 80 localidades de toda Galicia.

Máis de 800 artistas internacionais, nacionais e galegos de todos os xéneros que pisan forte nas listas de escoitas de agora e de sempre visitarán os Concertos do Xacobeo neste 2026. A aposta pola calidade e a diversidade de gustos e estilos para diferentes xeracións de públicos constitúe un atractivo único do programa, que continúa con 12 meses de música en directo, favorecendo o turismo e a oferta cultural de xeito deslocalizado ao longo de todo o ano.

O programa completo está recollido na páxina web www.concertosdoxacobeo.gal.