Santiago de Compostela, 21 de agosto de 2026

O Portal de Contratos Públicos da Xunta publicou, por medio a Consellería de Sanidade, a licitación, por un importe de 2.762.439 euros, da contratación do servizo de atención a usuarios dos sistemas e tecnoloxías da información dos hospitais do Servizo Galego de Saúde, co fin de resolver dun xeito continuado, rápido e eficiente as consultas, incidencias e avarías que poidan producirse no labor habitual dos traballadores dos centros hospitalarios.

As empresas interesadas neste procedemento teñen de prazo ata o 10 de setembro para presentar as súas ofertas.

As unidades de tecnoloxías da información dos distintos centros sanitarios teñen entre as súas misións a de garantir a correcta atención aos usuarios das infraestruturas informáticas básicas e dos sistemas de información corporativos. Esta correcta atención é un dos piares de calquera plan de sostemento de actividade dixital, sendo o único modo de garantir a confianza dos usuarios ante as dúbidas e posibles erros que xurdan no seu traballo cotián cos sistemas antes citados.

Nestes intres, a dixitalización da actividade asistencial en toda a rede hospitalaria do Servizo Galego de Saúde é unha realidade sen volta atrás, polo que se debe garantir a calidade do servizo de atención ao elevado número de profesionais que na actualidade fan uso dos sistemas de información dentro dos centros hospitalarios de cada unha das áreas sanitarias.

O período de vixencia inicial do contrato é de 12 meses. O prazo máximo de duración, coas posibles prórrogas, será de 5 anos, o que supón que o seu valor estimado se eleva, neste caso, ata os 11.871.641 euros.

Entre os servizos que se prestarán a través deste contrato están as consultas e solicitudes, as peticións de desenvolvemento dos programas informáticos, as incidencias, os cambios nas aplicacións, as tarefas relacionadas coa instalación, configuración e xestión do elementos de hardware e software, as accións preventivas que se realizan de xeito programado e, ademais, os labores relacionados coa implantación de novas aplicacións.

Novidades

Entre as principais novidades cuantitativas do contrato destaca o incremento do número máximo de usuarios que se atenderán, que pasa de valores comprendidos entre 4.500 e 7.000 usuarios por área sanitaria, a valores de entre 12.500 e 15.000 usuarios, así como a ampliación do catálogo de aplicacións obxecto de soporte, que pasa dun máximo de 150 a 200 sistemas.

Desde o punto de vista técnico refórzanse os requisitos de seguridade mediante a exixencia expresa de certificacións ISO 9001, ISO 27001 e o Esquema Nacional de Seguridade.

Ademais, introdúcense novos mecanismos de seguimento e control, con obrigas específicas de elaboración de informes, integración co sistema corporativo de xestión da calidade e novas penalizacións asociadas ao incumprimento destes requisitos e un maior control organizativo e operativo da prestación.