Santiago de Compostela, 30 de agosto de 2026

Os cinco Polos de emprendemento e apoio ao emprego que a Xunta mantén activos na provincia de Lugo xa acompañaron arredor de 1.500 proxectos empresariais desde a súa posta en marcha, contribuíndo á creación de máis de 116 novas empresas. A Fonsagrada, Mondoñedo, Friol, Monforte de Lemos e Sarria conforman esta rede provincial, que ofrece asesoramento individualizado e gratuíto ás persoas que buscan iniciar unha actividade ou dar continuidade e consolidar un negocio xa existente.

No marco deste traballo, o persoal técnico dos Polos realizou ata o de agora máis de 4.900 titorías, presenciais e en liña, adaptadas ás necesidades de cada iniciativa e ás distintas fases polas que atravesan os proxectos emprendedores.

O perfil das persoas que recorren a este servizo amosa, ademais, unha importante presenza feminina, xa que máis da metade dos proxectos asesorados na provincia están impulsados por mulleres. Por actividade económica, a hostalaría concentra o maior número de iniciativas, cun 20% do total, seguida do comercio, cun 16%, e dos servizos, cun 13%.

Outro dos ámbitos nos que incide a Rede é o da remuda empresarial. As iniciativas vinculadas á transmisión de negocios representan o 6% dos proxectos atendidos en Lugo. A través deste servizo, os Polos poñen en contacto ás persoas propietarias de negocios que queren vender ou alugar a súa actividade con potenciais emprendedores interesados en asumir a súa xestión, facilitando así a continuidade de empresas viables e reducindo os riscos asociados á creación dun negocio desde cero.

Neste ámbito, a Xunta conta tamén co Bono remuda, integrado nunha das cinco liñas da orde unificada de axudas para persoas autónomas, que permanece aberto ata o 30 de setembro cun orzamento de 1,5 M€.

A actividade dos cinco polos lugueses esténdese tamén máis alá do asesoramento individual. Desde a súa creación, organizaron máis de 820 actividades, entre encontros con entidades e axentes do territorio, accións formativas e diferentes eventos destinados a impulsar o emprendemento e favorecer a colaboración no ámbito local.

Unha rede de impulso ao emprendemento

A Rede de polos forma parte da aposta estratéxica do Goberno galego por apoiar iniciativas que contribúan á innovación e á vertebración do territorio, fixando poboación no rural e poñendo a disposición das persoas emprendedoras todas as ferramentas necesarias para impulsar as oportunidades de negocio e aproveitar os recursos dispoñibles. Nese sentido, é unha das ferramentas clave da futura Estratexia de emprendemento ligado ao territorio, a través da que se seguirá potenciando o seu labor para identificar oportunidades locais e sectores tractores de cada zona.

Posta en marcha en xullo de 2022, actualmente, a Rede conta con 15 oficinas activas, espalladas por todo o territorio: tres na provincia da Coruña (Ferrol, Coristanco e Melide), cinco na provincia de Lugo (Friol, Mondoñedo, Sarria, A Fonsagrada e Monforte de Lemos); catro na provincia de Ourense (O Carballiño, Baños de Molgas, O Barco de Valdeorras e Verín); e tres na provincia de Pontevedra (Silleda, O Porriño e Vilanova de Arousa).

Desde o inicio, no total de Galicia xa se atenderon máis de 7.100 experiencias de emprendemento, entre as que predomina o sector servizos, seguido do comercio e da hostalaría. Ademais, no conxunto das catro provincias, lévanse realizado máis de 22.300 titorías e máis de 2.800 actividades.