Santiago de Compostela, 30 de agosto de 2026

Máis de 2.000 proxectos de emprendemento pasaron xa polos tres Polos de apoio ao emprego que a Xunta ten activos na provincia de Pontevedra. O traballo desenvolvido desde Silleda, O Porriño e Vilanova de Arousa permitiu acompañar persoas con novas ideas de negocio ou con actividades xa en funcionamento e contribuíu á creación de 135 novas empresas.

O asesoramento prestado pola Rede abrangue as distintas etapas dun proxecto empresarial e realízase de forma individualizada, gratuíta e tanto presencialmente como en liña. No caso da provincia de Pontevedra, os equipos técnicos dos Polos realizaron máis de 5.000 titorías desde o inicio do programa.

A presenza feminina é especialmente significativa entre as persoas que recorren a este servizo, xa que preto do 60% dos proxectos asesorados na provincia están impulsados por mulleres. Por sectores, o comercio sitúase á cabeza, cun 15% das iniciativas, seguido dos servizos, cun 13%, e das actividades artísticas, recreativas e de entretemento, que representan o 11%.

A Rede presta tamén unha atención específica ás situacións de remuda, unha fórmula que permite aproveitar o traballo, os investimentos e a experiencia acumulada por negocios xa consolidados. Estas iniciativas supoñen o 6% do total dos proxectos atendidos polos Polos. O acompañamento neste ámbito facilita o contacto entre persoas propietarias que buscan transmitir ou alugar o seu negocio e potenciais emprendedores que queren asumir a súa continuidade. Trátase, así, dunha vía para preservar actividade económica e emprego e, ao mesmo tempo, reducir a incerteza propia da creación dunha empresa desde os seus primeiros pasos.

Para apoiar estes procesos, a Xunta mantén aberta ata o 30 de setembro a convocatoria do Bono remuda, incluída entre as cinco liñas da orde unificada de axudas para persoas autónomas, cun orzamento de 1,5 M€.

O papel dos Polos como puntos de conexión e dinamización do territorio tamén se manifesta nas arredor de 400 actividades organizadas en Pontevedra desde a súa creación. Ademais do asesoramento, estes espazos impulsan encontros con entidades, formación e eventos destinados a favorecer novas oportunidades e relacións de colaboración.

Unha rede de impulso ao emprendemento

A Rede de polos forma parte da aposta estratéxica do Goberno galego por apoiar iniciativas que contribúan á innovación e á vertebración do territorio, fixando poboación no rural e poñendo a disposición das persoas emprendedoras todas as ferramentas necesarias para impulsar as oportunidades de negocio e aproveitar os recursos dispoñibles. Nese sentido, é unha das ferramentas clave da futura Estratexia de emprendemento ligado ao territorio, a través da que se seguirá potenciando o seu labor para identificar oportunidades locais e sectores tractores de cada zona.

Posta en marcha en xullo de 2022, actualmente, a Rede conta con 15 oficinas activas, espalladas por todo o territorio: tres na provincia da Coruña (Ferrol, Coristanco e Melide), cinco na provincia de Lugo (Friol, Mondoñedo, Sarria, A Fonsagrada e Monforte de Lemos); catro na provincia de Ourense (O Carballiño, Baños de Molgas, O Barco de Valdeorras e Verín); e tres na provincia de Pontevedra (Silleda, O Porriño e Vilanova de Arousa).

Desde o inicio, no total de Galicia xa se atenderon máis de 7.100 experiencias de emprendemento, entre as que predomina o sector servizos, seguido do comercio e da hostalaría. Ademais, no conxunto das catro provincias, lévanse realizado máis de 22.300 titorías e máis de 2.800 actividades.